Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 320 Hüküm no: 315 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Hasan Çelebi ve eşi Rukiye bt. Mehmed’in Hüseyinpaşazâde Mehmed Bey Vakfı’na ait evin tasarruf hakkını Mustafa’ya devrettikleri Mahmiye-i İstanbul’da Aksaray kurbünde İsmailağa Mahallesi ahâlîsinden es-Seyyid Hasan Çelebi b. es-Seyyid İsmail ve zevcesi olup zâtı ta‘rîf-i şer‘î ile mu‘arrefe olan Rukiye bt. Mehmed nâm hatun meclis-i şer‘-i hatîr-i lâzımü’t-tevkīrde hâlâ sadrâzam-ı bedr efham hazretlerinin kapıcılar bölükbaşısı olan bâ‘isetü hâzihi’l-vesîka Mustafa Ağa b. Hüseyin b. Abdullah tarafından husûs-ı âti’z-zikre vekîl-i şer‘îsi Mehmed b. Abdullah nâm mahzarında her biri ikrâr ve takrîr-i kelâm edip merhûm Hüseyin Paşazâde Mehmed Bey Vakfı’ndan olup mahalle-i mezbûrede vâki‘ iki tarafdan yine vakf-ı mezbûrdan olan menzil ve iki tarafdan tarîk-i âm ile mahdûd ma‘lûmü’l-müştemilât vakıf menzil ale’l-iştirâki’s-seviyy bi’l-icâreteyn taht-ı tasarrufumuzda olmağla vakf-ı mezbûra meşrûtiyyet üzere mütevellî olan Mehmed Bey diyâr-ı âharda olmağın li-ecli’t-tenfîz vakf-ı mezbûra kıbel-i şer‘den kāimmakām-ı mütevellî nasb ve ta‘yîn işbu Mehmed Efendi izin ve ma‘rifetiyle menzil-i mezbûru mûmâ-ileyh Mustafa Ağa’ya iki yüz kırk guruş bedel mukābelesinde her birimiz ferağ ve tefvîz eylediğimizde ol dahi ber-vech-i muharrer tefevvüz ve kabûl etmeğin bedel-i mezbûr iki yüz kırk guruşu bi’l-münâsafa yedinden tamamen ahz u kabz eyledik. Min-ba‘d menzil-i merkūm mûmâ-ileyh Mustafa Ağa’nın hakk-ı müfevvezi olup bizim kat‘â alâka ve dahlimiz kalmamışdır dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ ve işrîn min-Cumâdelâhire li-sene selâse ve erba‘în ve mi’e ve elf. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, Du‘âcı İbrahim b. Mustafa.