Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 319 Hüküm no: 314 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Ahmed Çelebi’nin evini Ahmed Çelebi b. Hasan’a sattığı Mahmiye-i İstanbul’da Bostancıbaşı Ali Mahallesi’nde sâkin es-Seyyid Ahmed Çelebi b. es-Seyyid Mustafa nâm kimesne meclis-i şer‘-i şerîf-i enverde işbu hâfızü’l-kitâb Ahmed Çelebi b. Hasan nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Tarsus Mahallesi’nde vâki‘ bir tarafdan İmâm Ali Efendi mülkü ve bir tarafdan Hamza Beşe mülkü ve bir tarafdan Usta Hüseyin mülkü ve bir tarafdan tarîk-i hâs ile mahdûd bir bâb oda ve bir matbah ve bi’r-i mâ ve kenîf ve havluyu müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Ahmed Çelebi’ye altmış altı guruşa bey‘ ve temlîk ve teslîm eylediğimde ol dahi iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr altmış altı guruşu bana def‘ ve teslîm ben dahi yedinden tamamen ahz u kabz eyledim. Fîmâ-ba‘d menzil-i mahdûd-ı mezkûr mezbûr Ahmed Çelebi’nin mülk-i müşterâsı olup benim kat‘â alâka ve medhalim kalmadı. Keyfe-mâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Usta Hüseyin b. Ramazan, el-Hâc Abdulkādir b. Fethullah, Ali Beşe b. Abdullah, Mehmed b. Ahmed, Süleyman Beşe b. Hüseyin, Mustafa Çelebi b. İbrahim ve Abdullah Çelebi b. ( ) ve gayruhum mine’l-huzzâr.