Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 321 Hüküm no: 317 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Hüseyin ile Mustafa b. Mehmed’in çocukken çelik oyunundan dolayı yaralama olayıyla ilgili davadan sulh oldukları Mahmiye-i İstanbul’da Yedikule kurbünde Hacı Evhad Mahallesi’nde sâkin İsmail b. Hüseyin nâm şâbb-ı emred meclis-i şer‘-i hatîr-i lâzımü’t-tevkīrde tahmînen on yedi yaşında bâ‘isü hâzihi’l-vesîka Mustafa b. Mehmed mahzarında ikrâr-ı tâm ve takrîr-i kelâm edip târih-i kitâbdan dokuz sene mukaddem mezbûr Mustafa sagīr olduğu hâlde çelik çomak tâ‘bir olunur lu‘bun âletinden çelik ile sağ gözüme amden hâl-i sagīrimde bi-gayr-ı hakkın darb ve mezbûrun darbından nâşî zikrolunan gözümün basîri bi’l-külliye zâil olup mûceb-i şer‘îsini ikimiz dahi âkıl ve bâliğ ve reşid olmamızla merkūm Mustafa’dan taleb ve da‘vâ eylediğimde beynimizde münâza‘ât-ı kesîre ve muhâsamât-ı şedîde cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni iki bin akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki bin akçeyi merkūm Mustafa yedinden tamamen ahz u kabz eylediğimden sonra husûs-ı mezkûra müte‘allika âmme-i da‘vâdan ben mezbûr Mustafa’nın zimmetini ibr[â] ve iskāt eylediğimde ol dahi bedel deyü bana medfû‘u olan meblağ-ı mezbûra müte‘allika âmme-i da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fî-17 min-Receb sene [1]143. Şuhûdü’l-hâl: Mehmed Ağa b. Abdullah Dursunzâde, Hasan Efendi b. Mustafa el-imâm, Mustafa Çelebi b. el-Hâc Ali, el-Hâc Mehmed b. İbrahim, el-Hâc Mehmed b. Ömer, Osman Beşe b. Mustafa, Osman Çelebi b. Hüseyin, Ömer b. Osman.