Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 322 Hüküm no: 318 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar esnafının Şark seferi için aralarında topladıkları paradan dolayı Mahmud Ağa b. Hüseyin ve Hamza Ağa b. Muslu ile olan davalarında sulh oldukları Attâr hırfeti hüccetidir. Mahmiye-i İstanbul’da attâr hırfetinin kethüdâsı olan el-Hâc Osman b. Abdullah ve Yiğitbaşı Mustafa b. Hüseyin ve üstâdlardan Abdullah Çelebi b. Abdürrahim ve Mehmed Çelebi b. İbrahim ve el-Hâc Mehmed b. Nasuh nâm kimesneler meclis-i şer‘-i şerîf-i enverde hırfet-i mezkûre erbâbından bâ‘isü’l-kitâb Mahmud Ağa b. Hüseyin ve Hamza Ağa b. Muslu nâm kimesneler mahzarında her biri ikrâr ve takrîr-i kelâm edip işbu sene-i mübârekede şark cânibine sefer-i hümâyûn mukarrer olup İstanbul esnâfından ordu ihrâcı fermân buyrulmağın hırfetimizin dört aded haymesi olup zikrolunan haymelere mezkûrân Mahmud Ağa ve Hamza Ağa’yı taraflarımızdan vekîl nasb ve ta‘yîn edip esnâf-ı mezkûre erbâbından ve mülhaklarımızdan cem‘ ve tahsîl eylediğimizden dört aded hayme mühimmâtına sarf etmek üzere mezbûrâna yedi yüz guruş def‘ ve teslîm olunup onlar dahi ba‘de’l-ahz ve’l-kabz Üsküdar sahrâsında Ordu-yı hümâyûna mu‘tâd ve kadîm üzere hizmet ederlerken sefer-i hümâyûn meks olunmağla medfû‘umuz olan meblağ-ı mezkûr yedi yüz guruşu taleb eylediğimizde cevâblarında makbûzumuz olan meblağ-ı mezkûrdan fazla yüz altmış guruş masrûfumuz vardır deyü def‘le mukābele etmeleriyle el-hâletü hâzihî merkūmân Mahmud Ağa ve Hamza Ağa ile medfû‘umuz olan meblağ-ı mezbûra müte‘allika da‘vâdan fâriğler olup onlar dahi ziyâde masrûfları olan meblağ-ı mezkûre müte‘allika da‘vâdan fâriğler olup ba‘de’l-yevm her birimiz âhar ile husûs-ı mezkûra müte‘allika da‘vâ ve nizâ‘ımız kalmayıp kat‘-ı nizâ‘ eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Cumâdelâhire li-sene selâse ve erba‘în ve mi’e ve elf. Şuhûdü’l-hâl: Kethüdâ Mehmed Ağa b. Mehmed, Mehmed Çelebi b. Abdullah, Salih Çelebi b. Mustafa, Mustafa b. Süleyman, Hüseyin Çelebi b. Hasan.