Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 181 Hüküm no: 187 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un çeşitli ev eşyalarını oğlu Mehmed Ağa’ya sattığı Medîne-i Üsküdar’da Hamza Fakıh mahallesi sâkinelerinden Âişe bt. Abdullah b. Abdurrahman nâm hatun tarafından ber-vech-i âtî vekîl olduğu zât-ı mezbûreyi bi’l-ma‘rifeti’ş-şer‘iyye ârifân el-Hâc Abdullah b. el-Hâc Hüseyin ve el-Hâc Mustafa b. Ali nâm kimesneler şehâdetleriyle şer‘an sâbit olan el-Hâc Hasan b. Abdullah nâm kimesne meclis-i şer‘-i hatîrde müvekkile-i mezbûrenin sadri kebîr oğlu işbu râfi‘ü’l-vesîka fahrü’l-akrân es-Seyyid el-Hâc Mehmed Ağa b. es-Seyyid el-Hâc Hasan Ağa mahzarında ikrâr ve takrîr-i kelâm edip akd-i âti’z-zikrin sudûruna değin müvekkile-i mezbûrenin silk-i mülk-i sahîhinde münselik emlâkinden otuz minder ve düz ve çatma altmış yastık ve otuz yorgan ve yirmi kapaklı tencere ve kapaklı elli sahan ve sagīr ve kebîr yirmi lengeri ve beş kebîr sini ve dört sagīr sini ve beş güğüm ve sagīr iki güğüm ve dört serdanbâr? ve yemenî ve çuka on iki mak‘ad ve beş Selanik orta keçesi ve beş tâbe-i dest ve üç musluk-ı güğüm ve sâir şorba tası ve oluklu iki şerbet tası ve on iki beyâz penbe şilte ve altı kapı perdesi ve beş kebîr şam‘dân ma‘a mikrâs ve altı sagīr şam‘dân ma‘a mikrâs ve altı iskemle ve dört leğen ma‘a ibrik ve üç kebîr âbdest leğeni ve iki sofra ma‘a peşkir ve iki sofra ma‘a peşkir işleme ve altı kahve ibriği ve sagīr fağfûrî kâse ve inci kolanlı ve zümrüd taşlı inci kuşak ve bir la‘l yüzük ve bir zümrüd habbe küpe ve bir kakum kürk ve bir samur kürk ve iki dîbâ anteri ve kaftan ve on elvan çekme ve iki ferâce ve otuz beş miskāl altın bileziği tarafeynden îcâb ve kabûlü hâvî bey‘-i bâtt-ı sahîh-i şer‘î ile bin guruşa oğlu mûmâ-ileyh es-Seyyid el-Hâc Mehmed Ağa’ya bi-safkatin vâhidetin bey‘ ü temlîk ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm bin guruş mutâlebesinden oğlu mûmâ-ileyh es-Seyyid el-Hâc Mehmed Ağa’nın zimmetini ibrâ-i âmm-ı katı‘u’n-nizâ‘la ibrâ ve iskāt eyledi ba‘de’l-yevm eşyâ-i muharrere-i mezkûrede müvekkilem mezbûre Âişe Hatun’un kat‘â alâka ve medhali kalmayıp mûmâ-ileyh es-Seyyid el-Hâc Mehmed Ağa’nın mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedi dediklerinde [dedikde] gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: Fahrü’l-eimme Süleyman Efendi b. Şeyh Ali Efendi, Mustafa Ağa b. Osman Ağa, Ayntâbî İsmail Çelebi b. Davud, Mustafa Beşe b. Ali, el-Hâc Ahmed Ağa b. Ali, el-Hâc Salih Ağa b. Hasan, Tokadî el-Hâc Ahmed Ağa, el-Hâc Abdullah [b.] el-Hâc Ahmed, Ahmed Beşe b. Mehmed, Haseki Ahmed Ağa, İbrahim Bey.