Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 182 Hüküm no: 188 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamile olan Zeyneb Hatun’a boşandığı kocası İbrahim tarafından nafaka takdir edildiği Medîne-i Üsküdar’da Mirâhur mahallesi sâkinelerinden olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan işbu râfi‘atü’l-vesîka Zeyneb bt. Osman nâm hatun meclis-i şer‘-i şerîf-i enverde zevc-i sâbıkı İbrahim b. Ahmed nâm kimesne mahzarında bast-ı kelâm ve ifâde-i merâm edip mezbûr İbrahim zevcim olup bundan akdem beni bâyinen tatlîk etmekle mezbûrun firâşından hâsıl hamlim zuhûr etmekle vaz‘-ı haml edinceye değin kıbel-i şer‘den mezbûr İbrahim üzerine kadr-ı ma‘rûf nafaka-bahâ farz ve takdîr olunmak matlûbumdur dedikde hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri dahi mezbûre Zeyneb’in zarûret-i nafakasi’çün târîh-i kitâbdan külle yevm yedişer akçe farz ve takdîr buyurup meblağ-ı mefrûz-ı mezkûru mezbûre Zeyneb kendi levâzımına harc ü sarfa ve lede’l-hâce istidâneye ve vakt-i zaferde mezbûr İbrahim üzerine rücû‘a mezbûre Zeyneb Hatun’a kıbel-i şer‘den izin birle mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: Mehmed Beşe b. Osman, el-Hâc Hanefi b. Ali, Mustafa Bey b. Halil, Hasan Bey b. Ramazan, İsa Beşe b. Musa, Mustafa Bey b. Ahmed, es-Seyyid Süleyman b. Mehmed.