Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 196 Hüküm no: 206 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe’nin menzilini müştemilatıyla birlikte Arife Hatun’a sattığı Medîne-i Üsküdar’da Turbâli mahallesi sâkinlerinden Osman Beşe b. Hasan nâm kimesne meclis-i şer‘-i şerîf-i enverde işbu râfi‘atü’l-vesîka Arife bt. Abdullah nâm hatun mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup mahalle-i mezbûrede vâki‘ bir tarafdan Fâtıma Hatun mülkü ve bir tarafdan Eskici Ali mülkü ve bir tarafdan Hanım mülkü ve bir tarafdan tarîk-i âm ile mahdûd iki bâb fevkānî oda ve bir sofa ve iki bâb tahtânî oda ve kenîf ve bir mikdâr bahçeyi müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz otuz guruşa mezbûre Arife Hatun’a bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz otuz guruşu mezbûre Arife Hatun yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden menzil-i mahdûd-ı mezkûrda benim kat‘â alâka ve medhalim kalmayıp mezbûre Arife Hatun’un mülk-i müşterâsı ve hakk-ı sırfı olmuşdur keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 Safer sene 1151 Şuhûdü’l-hâl: Ahmed Bey b. Mehmed, diğer Ahmed b. Osman, Mahmud Beşe b. Ahmed, Hasan b. Hüseyin, Ömer b. Süleyman, es-Seyyid Süleyman b. Mehmed, Hasan Bey b. Ramazan, el-Hâc Hanefi b. Ali.