Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 195 Hüküm no: 205 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Porfile zimminin yeniçerilerin on yedinci cemaati taamiyeleri vakfında rehin olan evinin satılıp vakfa olan borcunun tahsil edildiği Medîne-i Üsküdar’a muzâfe Adalar nâhiyesine tâbi‘ Büyükada sâkinlerinden Porfile v. Yamandi v. Dimitri nâm zimmî tarafından bâ-hüccet-i şer‘iyye vekîl olduğu Ömer Ağa b. Ahmed ve Mehmed Ağa b. Abdullah nâm kimesneler şehâdetleriyle sâbit olan Dergâh-ı âlî yeniçerilerinin on yedinci cemâ‘ati odasının nâzırı olan Mehmed Çelebi b. Ahmed nâm kimesne meclis-i şer‘-i hatîrde işbu râfi‘atü’s-sifr Cevheriye bt. Hürmüz nâm Nasrâniye muvâcehesinde bi’l-vekâle ikrâr ve takrîr-i kelâm edip zikr olunan odada vâki‘ etrâf-ı erba‘adan Anderya? ve Varsi ve Bakkāl Yorgi mülkleri ve Hürmüz mahzeni ve Dimitraki bahçesi ve tarîk-i âm ve leb-i deryâ ile mahdûd sekiz bâb oda ve bir sedir ve beş mahzen ve bi’r-i mâ ve bahçe ve kenîfi müştemil mülk menzil müvekkil-i merkūm Porfile zimmînin mülkü olup lâkin müvekkil-i mezbûrun zikr olunan on yedi cemâ‘ati neferâtının ta‘âmiyeleri vakfının mütevellîsi işbu hâzır bi’l-meclis el-Hâc Ahmed b. Mehmed nâm kimesneye bin guruş deyni mukābelesinde istiğlâl ve rehin olup menzil-i mezkûru ba‘de’l-müzâyede bey‘ ve edâ-i deynine tarafından beni vekîl eylediğine binâen menzil-i mahdûd-ı mezkûru rehniyetden ba‘de’l-fekk tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Cevheriye Nasrâniyeye ba‘de’l-müzâyede bin dört yüz yirmi beş guruşa bi’l-vekâle bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm bin dört yüz yirmi beş guruşu vekâletim hasebiyle bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezkûrda müvekkil-i mezbûr Porfile’nin kat‘â alâka ve medhali kalmayıp mezbûre Cevheriye’nin mülk-i müşterâsı ve hakk-ı sırfı olmuşdur keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mütevellî-i mezbûr meclis-i mezkûrda vekîl-i merkūm Mehmed Çelebi mahzarında ikrâr-ı tâm edip mütevellîsi olduğum mâl-ı vakfdan bin guruş ve bir senenin icâresinden dahi yüz elli guruş ki cem‘an bin yüz elli guruşu vekîl-i merkūm yedinden tevliyetim hasebiyle ahz u kabz eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: Ali Odabaşı b. Abdullah, Başkorucu Mehmed Odabaşı b. Abdullah, Ömer Odabaşı b. Ömer Efendi, Ömer Odabaşı b. Receb, Ali Yazıcı b. İbrahim, Yazıcı Molla Hasan b. Abdullah, Veli Bey b. Mehmed, Mustafa Bey b. Ahmed, Hasan Bey b. Ramazan, Mustafa Bey b. Halil, Ali Beşe b. Musa, Mehmed Bey b. Ahmed.