Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 197 Hüküm no: 208 Orijinal metin no: [60b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamile olan Ümmügülsüm’e boşandığı eşi Mustafa’nın üzerine nafaka takdir edildiği Mahrûse-i Galata’ya tâbi‘ kasaba-i Tophane’de Balıkçı mahallesinde sâkine ve zâtı vech-i şer‘ üzere mu‘arrefe olan işbu râfi‘atü’l-vesîka Ümmügülsüm bt. Ahmed nâm hatun meclis-i şer‘-i hatîrde medîne-i Üsküdar sâkinelerinden sâbıkā zevcim Mustafa b. İbrahim nâm kimesne mahzarında bast-ı kelâm ve ifâde-i merâm edip mezbûr Mustafa zevcim olup bundan akdem beni bâyinen tatlîk etmekle mezbûrun firâşından hâsıl hâlâ hamlim olmağla vaz‘ edinceye değin kıbel-i şer‘den kadr-ı ma‘rûf nafaka farz ve takdîr olunmak matlûbumdur dedikde hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri dahi tarafeynin rızâsıyla târîh-i kitâbdan külle yevm beşer akçe nafaka-bahâ farz ve takdîr edip meblağ-ı mefrûz-ı mezkûru ber-vech-i muharrer kendi nafakasi’çün harc ü sarfa ve lede’l-hâce istidâne ve vakt-i zaferde zevc-i mutallıkı mezbûr Mustafa üzerine rücû‘a mezbûre Ümmügülsüm’e kıbel-i şer‘den izin birle mâ hüve’l-vâki‘ bi’t-taleb ketb olundu. Fî-gurreti şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: İsmail Çelebi b. İbrahim, es-Seyyid Ahmed Çelebi b. Mehmed, Mustafa Çelebi b. Ahmed, es-Seyyid Süleyman b. Mehmed, Mehmed Bey b. Mehmed.