Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 198 Hüküm no: 209 Orijinal metin no: [60b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Râbia Hatun’un varislerinin miras hissesi davasında sulh olduğu Medîne-i Üsküdar’da Gülfem Hatun mahallesi sâkinelerinden iken bundan akdem vefât eden Râbia bt. Abdullah nâm hatunun verâseti zevc-i metrûku İbrahim Dede b. el-Hâc Osman nâm kimesne ile usûbet-i sebebiye cihetinden mevlâ-yı ıtâkesi merhûm Süleyman’ın sulbî kebîr oğlu Osman Bey b. el-mezbûr Süleyman nâm kimesne ile sagīr oğlu Ahmed’e münhasıra olduğu şer‘an tahakkukundan sonra mezbûr Osman Bey asâleten ve sagīr-i mezbûr Ahmed’in anası ve tesviye-i emrine vasiyesi olan Zeyneb bt. Abdullah nâm hatun tarafından ber-vech-i âtî vekîl olduğu zât-ı mezbûreyi bi’l-ma‘rifeti’ş-şer‘iyye ârifân Mehmed Bey b. Mustafa ve Halil Ağa b. Ahmed nâm kimesneler şehâdetleriyle şer‘an sâbit olan mezbûr Osman Bey asâleten [ve] vekâleten meclis-i şer‘-i şerîf-i enverde müteveffât-ı mezbûrenin zevci işbu râfi‘ü’l-vesîka mezbûr İbrahim Dede mahzarında bi’l-asâle ve bi’l-vekâle ikrâr ve takrîr-i kelâm edip müteveffât-ı mezbûrenin terekesinden mezbûr İbrahim Dede’nin yedinde olan mübâya‘a hüccetinde zikr olunan eşyâ-i ma‘lûmeden mâ‘adâ sâir eşyâ-i ma‘lûmesini ber-mûceb-i defter-i müfredât zevci merkūm İbrahim Dede ketm ü ihfâ etmiş idi deyü bundan akdem taleb ve da‘vâ eylediğimde ol dahi bi’l-külliye inkâr etmekle ben müdde‘âmı bir vechile isbâta iktidârım olmayıp tahlîf olunduğu hâlde sagīre nef‘ hâsıl olmamağla sulh sagīr-i mezbûr hakkında her vechile enfa‘ olmağın beynimize muslihûn tavassut edip beni da‘vâ-yı mezkûrumdan an-inkârin mezbûr İbrahim Dede [ile] on üç guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı merkūm on üç guruşu bi’t-tamâm ve’l-kemâl mezbûr İbrahim Dede yedinden ahz u kabz eyledim ba‘de’l-yevm müteveffât-ı mezbûrenin gerek hüccet derûnunda tahrîr olunan eşyâ-i ma‘lûmeye ve kıymetine ve mehr-i müecceline ve hâric-i defter-i müfredât mûcebince iddi‘â eylediğim eşyâ-i ma‘lûmeye ve müteveffât-ı mezbûrenin kalîl ü kesîr cemî‘ terekesine müte‘allıka vechen mine’l-vücûh ve sebeben mine’l-esbâb [61a] kat‘â da‘vâ ve husûmetim kalmayıp âmme-i de‘âvî ve kâffe-i mutâlebâtdan mezbûr İbrahim Dede’nin zimmetini ibrâ-i âmm-ı katı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Saferi’l-hayr li-seneti ihdâ ve hamsîn ve mi’ete ve elf. Şuhûdü’l-hâl: Hâfız Ömer Efendi b. Ali, es-Seyyid Mustafa Efendi b. es-Seyyid Abdullah, es-Seyyid el-Hâc Mustafa b. Mehmed, Süleyman Beşe b. Ahmed, Mehmed Çelebi b. Yusuf, Ahmed Ağa b. Hasan, diğer Hâfız Ömer Efendi b. Mustafa, Molla Ömer b. Abdullah.