Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 207 Hüküm no: 222 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mecnune Emine’ye kardeşi Derviş Mehmed’in vasi tayin edildiği Medîne-i Üsküdar’da Debbâğlar mahallesi sâkinelerinden olup bi-kazâillâhi te‘âlâ damla illeti sebebiyle cünûn-târî olan Emine bt. Osman b. Ali’nin derûn-ı menzilde olan eşyâsını hıfza kıbel-i şer‘den bir vasî nasb u ta‘yîn olunmak lâzım ve mühim olmağın emânet ile ma‘rûf ve müstakīm idiği zeyl-i sahîfede muharrerü’l-esâmî Müslimîn ihbârlarıyla lede’ş-şer‘i’l-enver zâhir olan mecnûne-i mezbûrenin li-ebeveyn karındaşı işbu râfi‘ü’l-vesîka Derviş Mehmed nâm kimesneyi hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri dahi ber-vech-i muharrer mecnûne-i mezbûrenin eşyâsını ber-mûceb-i defter ahz ve hıfza kıbel-i şer‘den vasî nasb u ta‘yîn buyurduklarında ol dahi vesâyet-i mezkûreyi kabûl ve merâsimini kemâ-yenbağī edâya ta‘ahhüd ve iltizâm etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min-Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: İmâm el-Hâc Mahmud Efendi b. Ahmed Efendi, Müezzin İbrahim Efendi b. Yusuf, Mustafa Ağa b. Ali, İbrahim Ağa b. Ali, Nuh Çelebi b. Mustafa, el-Hâc Ali Çelebi b. Süleyman, İsa Beşe b. Musa, Mehmed Odabaşı b. Mustafa.