Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 208 Hüküm no: 224 Orijinal metin no: [62b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın kızlarının evlerini satarak Hayreddin Çavuş mahallesi avarız vakfına olan borçlarını ödedikleri Medîne-i Üsküdar’da Hayreddin Çavuş mahallesi sâkinelerinden Âişe ve Fâtıma bintey Mustafa b. Abdullah nâm hatunlar taraflarından ber-vech-i âtî bey‘ ve kabz-ı semene ve semeninden zikri âtî vakfa olan deynlerini edâya ve fazla kalırsa îsâle küllemâ azeltüke fe-ente vekîlî mazmûnu üzere azl ü in‘izâlden masûne vekâlet-i devriye ile vekîlleri olduğu zât-ı mezbûretânı bi’l-ma‘rifeti’ş-şer‘iyye ârifân Ali Efendi b. Ebubekir ve Hasan Çelebi b. Halil nâm kimesneler şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükm-i şer‘î lâhık olan eş-Şeyh İbrahim Efendi b. Halil nâm kimesne meclis-i şer‘-i şerîf-i enverde işbu râfi‘atü’l-vesîka Râbia bt. el-Hâc Osman nâm hatun mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkiletân-ı mezbûretânın silk-i mülklerinde münselik emlâklerinden olup mahalle-i mezbûrede vâki‘ iki tarafdan Duhânî Memiş mülkü ve bir tarafdan tarîk-i hâs ve bir tarafdan tarîk-i âm ile mahdûd üç bâb fevkānî oda ve iki sofa ve bi’r-i mâ ve kenîfi ve bir mikdâr bahçeyi müştemil mülk menzil hâssa münâdilerinden hâzır bi’l-meclis Baba Ali b. Ali lisânıyla bir buçuk seneden mütecâviz sûk-ı sultânîde ve mecma‘-ı nâs olan mahallerde nidâ ve mezâd olunup rağabât-ı nâs bi’l-külliye münkatı‘a oldukdan sonra mezbûre Râbia Hatun üzerinde iki yüz yirmi bir guruş semende karâr ve ziyâde ile tâlib-i âhar zuhûr etmeyip semen-i merkūm menzil-i mezkûrun el-yevm semen-i misli olduğu zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’l-enver mütehakkık oldukdan sonra menzil-i mahdûd-ı mezkûr mahalle-i mezbûre bedel-i avârız vakfının nukūd-ı mevkūfesine bi’l-fi‘il mütevellî olan İmâm Mustafa Efendi b. Abdullah nâm kimesneye yüz elli üç guruş deynleri mukābelesinde bi-tarîkı’l-istiğlâl rehin olmağla menzil-i mezkûru rehniyetden ba‘de’l-fek tarafeynden îcâb ve kabûlü hâvî bey‘-i bâtt-ı sahîh-i şer‘î ile semen-i merkūm iki yüz yirmi bir guruşa mezbûre Râbia Hatun’a bi’l-vekâle bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm iki yüz yirmi bir guruşu bi’l-vekâle tamâmen alıp kabz eyledim ba‘de’l-yevm menzil-i mahdûd-ı mezkûrda müvekkilân-ı mezbûretânın kat‘â alâka ve medhalleri kalmayıp mezbûre Râbia Hatun’un mülk-i müşterâsı ve hakk-ı sırfı olmuşdur keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-şehri Rebî‘i’l-evvel li-seneti ihdâ ve hamsîn ve mi’ete ve elf. [63a] Şuhûdü’l-hâl: el-Hâc Ömer b. Receb, Mehmed Beşe b. Mansur, Hasan Odabaşı b. Receb, el-Hâc Mehmed b. Ali, Hasan Ağa b. Hüseyin, es-Seyyid Mehmed Çelebi b. Hüseyin, Mehmed Çelebi b. Hasan, İsmail Ağa b. Osman, Molla Mustafa Ağa b. Mehmed.