Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 209 Hüküm no: 225 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın evini müştemilatıyla birlikte Hasan Bey’e sattığı Medîne-i Üsküdar’da Selman Ağa mahallesi sâkinlerinden Mustafa b. Abdullah nâm kimesne meclis-i şer‘-i şerîf-i enverde işbu râfi‘ü’l-vesîka Hasan Bey b. Ramazan nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik emlâkimden olup mahalle-i mezbûrede vâki‘ bir tarafdan Mehmed Çelebi ve bir tarafdan Müftîzâde mülkü ve bir tarafdan Mahmud Dede bahçeleri ve bir tarafdan tarîk-i hâs ile mahdûd bir bâb fevkānî oda ve bir sofa ve iki bâb tahtânî oda ve bir mikdâr havluyu müştemil bir bâb mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile dört yüz guruşa mezbûr Hasan Bey’e [bey‘] ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm dört yüz guruşu merkūm Hasan Bey yedinden bi’t-tamâm ve’l-kemâl ahz u kabz eyledim ba‘de’l-yevm zikri mürûr eden menzil-i mahdûd-ı mezkûrda benim kat‘â alâka ve medhalim kalmayıp mezbûr [Hasan] Bey’in mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: Ömer Ağa b. Hüseyin, Osman Ağa b. Mehmed, el-Hâc Hanefi b. Ali, Hüseyin Çelebi [b.] Ebubekir, Hâfız Mehmed Efendi el-Müderris, es-Seyyid Süleyman b. Mehmed, Hasan Beşe b. Abdullah.