Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 211 Hüküm no: 228 Orijinal metin no: [63a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva ve Ayşe hatunların bir ev ve müştemilatındaki hisselerini Mustafa Çelebi’ye sattıkları Medîne-i Üsküdar’da Kefçe mahallesinde vâki‘ iki tarafdan es-Seyyid Mustafa Çelebi mülkü ve bir tarafdan Mehmed Ağa mülkü ve bir tarafdan tarîk-i âm ile mahdûd iki bâb fevkānî ve bir bâb tahtânî oda ve bi’r-i mâ ve kenîf ve bir mikdâr bahçeyi müştemil mülk menzil altı sehm i‘tibârıyla bir sehmi Havva bt. Abdullah nâm hatunun ve beş sehmi Âişe bt. Abdullah nâm hatunun mülkleri olduğu lede’ş-şer‘i’l-enver zâhir ve mütehakkık oldukdan sonra zâtı vech-i şer‘î üzere mu‘arrefe olan mezbûre Havva Hatun asâleten ve mezbûre Âişe tarafından ber-vech-i âtî vekîl olduğu zât-ı mezbûreyi bi’l-ma‘rifeti’ş-şer‘iyye ârifân el-Hâc Hüseyin b. Ebubekir ve Mustafa Bey b. Ahmed nâm kimesneler şehâdetleriyle şer‘an sâbit olan Mehmed Ağa b. el-Hâc Mustafa nâm kimesne vekâleten meclis-i şer‘-i şerîf-i enverde işbu râfi‘ü’l-vesîka es-Seyyid Mustafa Çelebi b. es-Seyyid Mustafa nâm kimesne mahzarında her biri bi’l-asâle ve bi’l-vekâle ikrâr ve takrîr-i kelâm edip müvekkile-i mezbûre ile benim bâlâda tafsîl olunduğu vech üzere ber-vech-i iştirâk mülkümüz olan menzil-i mahdûd-ı mezkûru tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz otuz guruşa mezbûr es-Seyyid Mustafa Çelebi’ye bi’l-asâle ve bi’l-vekâle bey‘ ü temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz otuz guruşu bi-kadri’l-hısâs tamâmen işbu meclis-i şer‘de müşteri-yi merkūm yedinden ahz u kabz eyledik ba‘de’l-yevm menzil-i mezkûrda benim ve müvekkile-i mezbûrenin kat‘â alâka ve medhalimiz kalmayıp mezbûr es-Seyyid Mustafa Çelebi’nin mülk-i müşterâsı ve hakk-ı sırfıdır keyfe mâ yeşâ ve yahtâr mutasarrıf olsun dediklerinde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: Veli Bey b. Mehmed, Hasan Bey b. Ramazan, es-Seyyid Süleyman b. Mehmed, Mustafa Bey b. Ahmed, Osman Çelebi b. Mehmed.