Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 210 Hüküm no: 227 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in evinin yarısını hanımı Havva Hatun’a sattığı Husûs-ı âti’l-beyânın mahallinde ketb ü tahrîri için savb-ı şer‘-i enverden irsâl olunan Mevlânâ Ahmed Efendi b. Hüseyin medîne-i Üsküdar’da Kefçe mahallesinde sâkin el-Hâc Mehmed b. Şa‘bân nâm kimesnenin menziline varıp zeyl-i vesîkada muharrerü’l-esâmî [Müslimîn] huzûrlarında akd-i meclis-i şer‘ ettikde mezbûr el-Hâc Mehmed meclis-i ma‘kūd-ı mezkûrda hâlâ zevcesi işbu râfi‘atü’l-vesîka Havva bt. eş-Şeyh Mustafa Efendi mahzarında ikrâr ve takrîr-i kelâm edip silk-i mülkümde münselik emlâkimden işbu akd-i meclis olunan bir tarafdan imâma meşrûta vakıf menzil ve bir tarafdan Osman mülkü ve bir tarafdan tarîk-i hâs ve bir tarafdan tarîk-i âm ile mahdûd iki bâb fevkānî oda ve sofa ve kenîfi müştemil mülk menzilimin arsası zevcem mezbûrenin mülkü ve üzerinde [binâ] eylediğim ebniyesi benim mülküm olmağla menzil-i mezbûrun müştemilâtından mülküm olan ebniyenin nısf-ı şâyi‘ini tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz guruşa zevcem mezbûre Havva Hatun’a bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz guruşu zevcem mezbûreye ta‘mîr için emrim ile menzil-i merkūma harc ü sarf edip zimmetimde vâcibü’l-edâ deynim olan yüz guruşa mahsûb ve takas eylediğimde ol dahi ber-vech-i muharrer mukāssa ve kabûl edip fîmâ-ba‘d hudûd-ı mezkûre ile mahdûd olan menzilin nısf-ı şâyi‘inde benim kat‘â alâka ve medhalim kalmayıp ebniye-i mezkûrenin nısfı zevcem mezbûrenin mülk-i mahzı ve hakk-ı sırfı olmuşdur keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ma‘an mürsel Mehmed ve Osman ile meclis-i şer‘a gelip alâ-vukū‘ihi inhâ ve ihbâr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: İmâm Hasan Efendi b. Hüseyin, Müezzin İbrahim Çelebi b. Receb, Yağcızâde b. el-Hâc Mustafa, es-Seyyid el-Hâc Ali Ağa b. es-Seyyid Hasan.