Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 214 Hüküm no: 232 Orijinal metin no: [63b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tablakâr Mehmed’in kendisini bıçaklayan Ali’ye açtığı davada sulh olduğu Medîne-i Üsküdar’da el-Hâc Osman fırınında sâkin tablakâr Mehmed b. Hüseyin nâm kimesne meclis-i şer‘-i şerîf-i enverde işbu râfi‘ü’l-vesîka es-Seyyid Ali b. Mehmed nâm kimesne mahzarında ikrâr ve takrîr-i kelâm edip mezbûr es-Seyyid Ali târîh-i kitâbdan bir gün mukaddem ba‘de’l-mağrib iskele kurbünde bi-gayr-ı hakkın amden bıçak ile sol kolum üzerinden darb ve cerh eyledi deyü da‘vâ sadedinde olduğumda ol dahi bi’l-külliye inkâr etmekle beynimizde münâza‘ât vâkı‘a olmuşidi el-hâletü hâzihi beynimize muslihûn tavassut edip beni da‘vâ-yı mezkûremden an-inkârin yedi guruş merhem-bahâ üzerine inşâ-i akd-i sulh eylediklerinde ben dahi bedel-i sulh olan meblağ-ı merkūm yedi guruşu mezbûr es-Seyyid Ali yedinden tamâmen ahz u kabz edip zikri mürûr eden cerh-i mezkûra ve mâ-yehdesü-minhe müte‘allıka âmme-i de‘âvî ve kâffe-i mutâlebâtdan mezbûr es-Seyyid Ali’nin zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min-şehri Rebî‘i’l-âhir li-seneti ihdâ ve hamsîn ve mi’ete ve elf. Şuhûdü’l-hâl: Veli Bey b. Mehmed, Mustafa Bey b. Ahmed, es-Seyyid Süleyman b. Mehmed, Osman Bey b. Mehmed, Mehmed Bey b. Ahmed, el-Hâc Hanefi b. Ali, Hasan Bey b. Ramazan.