Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 214 Hüküm no: 233 Orijinal metin no: [63b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe ile hanımı İsmihan Hatun’un ortak mülkleri olan evlerini Mehmed Ağa’ya sattıkları Zikri âtî husûsun mahallinde ketb ü tahrîri için savb-ı şer‘-i enverden irsâl olunan Mevlânâ Ahmed Efendi b. Hüseyin medîne-i Üsküdar’a tâbi‘ Kādı karyesine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘ ettikde karye-i mezbûre sâkinlerinden olup kendi tarafından asıl ve zevcesi İsmihan bt. Mehmed b. Abdullah nâm hatun tarafından ber-vech-i âtî vekîl olduğu zât-ı mezbûreyi bi’l-ma‘rifeti’ş-şer‘iyye ârifân Ali Çelebi b. Halil ve Ahmed Beşe b. Abdullah nâm kimesneler şehâdetleriyle şer‘an sâbit olan Hasan Beşe b. Ahmed nâm kimesne meclis-i ma‘kūd-ı mezkûrda fahrü’l-akrân işbu sâhibü’l-kitâb Mehmed Ağa b. Receb nâm kimesne tarafından ber-vech-i âtî tasdîka vekîli olan İmâm Mustafa Efendi b. Hüseyin nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin zevcem müvekkile-i mezbûre ile ale’l-iştirâki’s-seviyy yedimizde mülkümüz olup karye-i mezbûrede vâki‘ bir tarafdan Mehmed Ağa mülkü ve iki tarafdan Çukadâr Hasan Çelebi mülkü ve bir tarafdan tarîk-i âm ile mahdûd üç bâb fevkānî oda ve bir tahta-pûş ve bir kenîfi müştemil mülk menzilimizi tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr Mehmed Ağa’ya üç yüz guruşa bi’l-asâle ve bi’l-vekâle bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm üç yüz guruşu bi’t-tamâm ve’l-kemâl ahz u kabz eyledim ba‘de’l-yevm menzil-i mezkûrda benim ve zevcem müvekkile-i mezbûrenin kat‘â alâka ve medhalimiz kalmayıp mûmâ-ileyh Mehmed Ağa’nın mülk-i müşterâsı ve hakk-ı sırfıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr Mustafa ve Muhzır Osman ile meclis-i şer‘a gelip alâ-vukū‘ihi inhâ ve ihbâr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min-şehri Rebî‘i’l-âhir li-seneti ihdâ ve hamsîn ve mi’ete ve elf. Şuhûdü’l-hâl: Ahmed Efendi b. el-Hâc Mehmed, Abdullah b. İbrahim, Yusuf Ağa el-Mütevellî, el-Hâc Hüseyin b. Süleyman, Attâr Usta Ali Ağa.