Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 334 Hüküm no: 331 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Hasan Ağa b. İvaz’dan boşanan Afîfe bt. el-Hâc Hasan’ın mehrini ve kocasının hibe ettiği eşyaları aldığı Mahmiye-i İstanbul’da Küçük Ayasofya kurbünde Gurebâ Hüseyinağa Mahallesi sâkinelerinden olup zâtı İmâm Mustafa Efendi b. Abdüllatif ve Ali Ağa b. Mustafa nâm kimesneler ta‘rîfleriyle mu‘arrefe olan Afîfe bt. el-Hâc Hasan nâm hatun meclis-i şer‘-i şerîf-i enverde zevc-i dâhili bâ‘isü hâze’l-kitâb Hasan Ağa b. İvaz nâm kimesne mahzarında ikrâr ve takrîr-i kelâm edip mezbûr Hasan Ağa zevcim olup târih-i kitâb günü beni bâyinen tatlîk etmekle zimmetinde mütekarrir ve ma‘kūdun-aleyh olan on sekiz bin akçe mehr-i müeccelim ile nafaka-i iddet ve meûnet-i süknâm için bi’t-terâzî ta‘yîn olunan dört bin akçe ki cem‘an yirmi iki bin akçeyi bana def‘ ve teslîm ben dahi yedinden tamamen ahz u kabz eylediğimden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde mezbûr Hasan Ağa iâde-i kelâm edip işbu meclis-i şer‘de müşâhede ve mu‘âyene olunan eşyâ-i memlûkemden doksan guruş kıymetli bir çift altın bilezik ve yüz yirmi beş guruş kıymetli bir çift mücevher kuşağımı mezbûre Afîfe’ye hibe ve temlîk eylediğimde ol dahi ber-vech-i muharrer meclis-i hibede ittihâb ve kabûl eyledi ba‘de’l-yevm eşyâ-i muharrere-i mezbûre mezbûre Afîfe Hatun’un mülk-i mevhûbu olmuşdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mahalle-i mezbûre imâmı Mustafa Efendi b. Abdüllatif, Ali Ağa b. Mustafa, el-Hâc Osman b. Ali, Abdullah Efendi b. Mehmed, Müezzinbaşı Ali Efendi ve gayruhum mine’l-hâzırîn