Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 222 Hüküm no: 246 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Osman Ağa’nın varislerinin kendilerine intikal eden evi müştemilatıyla birlikte Osman’a sattıkları Zikri âtî husûsun mahallinde ketb ü tahrîri için savb-ı şer‘-i enverden irsâl olunan Mevlânâ Ahmed Efendi b. el-merhûm Hüseyin Efendi medîne-i Üsküdar’da Hacce Hatun mahallesinde sâkin fahrü’l-akrân el-Hâc Osman b. Mehmed Efendi’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘ ettikde fi’l-asl vilâyet-i Anadolu’da Harput sâkinlerinden olup medîne-i Üsküdar’a tâbi‘ İstavros karyesinde sâkin ve mütemekkin iken bundan akdem fevt olan Osman Ağa b. Halil b. Abdullah’ın verâseti zevce-i menkûha-i metrûkesi Emine bt. Abdurrahman b. Abdullah nâm hatuna ve sulbî kebîr oğulları İbrahim Ağa ve Halil nâm kimesneler ile sulbiye kebîre kızları Âişe ve Zeliha nâm hatunlara münhasıra olup kable’l-kısme mezbûr Halil dahi fevt olup verâseti zevce-i menkûha-i metrûkesi Ümmühani bt. İsmail b. Abdullah nâm hatuna ve vâlidesi mezbûre Emine ve li-ebeveyn er karındaşı mezbûr İbrahim Ağa’ya ve li-ebeveyn kız karındaşı mezbûretân Âişe ve Zeliha’ya münhasıra ve tashîh-i meselesi bi-hükmi’l-münâsahati’ş-şer‘iyye iki bin üç yüz dört sehmden i‘tibâr olunup sihâm-ı mezbûreden dört yüz sehmi mezbûre Emine Hatun’a ve dokuz yüz on sehmi mezbûr İbrahim Ağa’ya ve dörder yüz elli beşer sehmi mezbûretân Âişe ve Zeliha’dan her birine ve seksen dört sehmi mezbûre Ümmühani Hatun’a isâbeti tahakkukundan sonra mezbûrât Emine ve Ümmühani ve Âişe ve Zeliha nâm hatunlar taraflarından bâ-hüccet-i şer‘iyye vekîlleri olduğu zât-ı mezbûrâtı bi’l-ma‘rifeti’ş-şer‘iyye ârifân olan zeyl-i hüccetde isimleri mastûr İsmail Beşe b. el-Hâc İbrahim ve es-Seyyid Molla Ali b. Mehmed nâm kimesneler şehâdetleriyle şer‘an sâbit olan mezbûr İbrahim Ağa asâleten ve vekâleten meclis-i ma‘kūd-ı mezkûrda işbu râfi‘ü’l-vesîka mûmâ-ileyh el-Hâc Osman Ağa mahzarında bi’l-vesâye ve bi’l-vekâle ikrâr ve takrîr-i kelâm edip zikri sebk eden İstavros karyesinde vâki‘ bir tarafdan imâma meşrûta menzil ve bir tarafdan Havva Hatun menzili ve bir tarafdan Lala Osman Ağa menzili ve bir tarafdan tarîk-i âm ile mahdûd hâriciyesinde bir bâb fevkānî oda ve bir sofa ve kenîf ve ahır ve dâhiliyesinde iki bâb fevkānî oda ve bir cihânnümâ ve sofa ve kenîf ve tahtânî iki oda ve matbah ve bi’r-i mâ ve bir mikdâr havluyu müştemil mülk menzil ba‘de’l-müzâyede iki yüz otuz iki guruşda karâr edip ziyâdeye âhar tâlibi zuhûr etmeyip ziyâde on sekiz guruş zam ile iki yüz elli guruşa bi’l-asâle ve bi’l-vekâle mezbûr el-Hâc Osman Ağa’ya bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūmu bi-kadri’l-hısâs bi’l-asâle ve bi’l-vekâle tamâmen alıp kabz eyledim ba‘de’l-yevm menzil-i mahdûd-ı mezkûrda benim ve müvekkilât-ı mezbûrâtın kat‘â alâka ve medhali[miz] kalmayıp mezbûr el-Hâc Osman Ağa’nın mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Mehmed ve Osman ile meclis-i şer‘a gelip alâ-vukū‘ihi inhâ ve ihbâr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâni aşer min-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: el-Hâc Halil b. Abdullah, es-Seyyid Mustafa Çelebi b. es-Seyyid Ali, Mehmed Beşe b. Abdullah, Osman Bey b. Ahmed, es-Seyyid Muhyiddin Çelebi b. İsmail Efendi, es-Seyyid Mahmud Efendi b. Yahya, Halil Çelebi b. Ali.