Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 222 Hüküm no: 245 Orijinal metin no: [65a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un eşi Mustafa Çelebi’den muhâlaa yoluyla boşandığı Medîne-i Üsküdar’da Hamza Fakıh mahallesi sâkinelerinden zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Âişe bt. Ahmed nâm hatun meclis-i şer‘-i şerîf-i enverde zevc-i muhâli‘i işbu râfi‘ü’l-vesîka Mustafa Çelebi b. Ahmed nâm kimesne mahzarında ikrâr ve takrîr-i kelâm edip mezbûr Mustafa Çelebi zevcim olup beynimizde hüsn-i zindegânemiz olmayıp ben hul‘a tâlibe olduğum ecilden mezbûrun zimmetinde mütakerrir ve ma‘kūdün-aleyh olan iki bin akçe mehr-i müeccelimden fâriğa olup ve nafaka-i iddet-i ma‘lûmem ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru kabûl [ve] hukūk-ı zevciyete müte‘allıka âmme-i de‘âvî ve kâffe-i mutâlebâtdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min-şehri Rebî‘i’l-âhir [65b] li-seneti ihdâ ve hamsîn ve mi’ete ve elf. Şuhûdü’l-hâl: Hâfız Ömer Efendi b. Mustafa, el-Hâc Hanefi b. Ali, Osman Beşe b. Ahmed, es-Seyyid Süleyman b. Mehmed, İsa Beşe b. Musa, Mustafa Bey b. Halil.