Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 224 Hüküm no: 248 Orijinal metin no: [65b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un eşi Ahmed Çelebi ile muhâlaa yoluyla boşandığı Medîne-i Üsküdar’da Debbâğlar mahallesi sâkinelerinden Hadîce bt. Mehmed b. Abdullah nâm hatun tarafından ber-vech-i âtî vekîl olduğu zât-ı mezbûreyi bi’l-ma‘rifeti’ş-şer‘iyye ârifân Teberdâr Mehmed Ağa b. Ahmed ve el-Hâc Mehmed b. Abdullah nâm kimesneler şehâdetleriyle şer‘an sabit olan Ali Efendi b. Ahmed nâm kimesne meclis-i şer‘-i hatîrde müvekkile-i mezbûrenin hâlâ zevci işbu râfi‘ü’l-vesîka Ahmed Çelebi b. el-Hâc Abdullah nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Hadîce üç bin akçe mehr-i müeccel tesmiyesiyle zevci olup beynlerinde hüsn-i zindegâneleri olmayıp hul‘a tâlibe olduğu ecilden zevci merkūm zimmetinde mütekarrir ve ma‘kūdün-aleyh olan sâlifü’z-zikr üç bin akçe mehr-i müeccelini işbu meclisde vekâletim hasebiyle ahz u kabz edip nafaka ve iddet-i ma‘lûmesinden fâriğa olup ve meûnet-i süknâsı dahi kendi üzerine olmak üzere muhâla‘a-i sahîha-i şer‘iyye ile bi’l-vekâle hul‘ eylediğimde ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allıka âmme-i de‘âvîden her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min-şehri Rebî‘i’l-âhir li-seneti ihdâ ve hamsîn ve mi’ete ve elf. Şuhûdü’l-hâl: el-Hâc Mehmed b. Abdullah, el-Hâc Hanefi b. el-Hâc Ali, Hâfız Ömer b. Mustafa, es-Seyyid Süleyman b. Mehmed, Mahmud Bey b. Mehmed.