Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 224 Hüküm no: 249 Orijinal metin no: [65b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un bakmakta olduğu küçük çocuğa nafaka takdir edildiği Medîne-i Üsküdar’da Reis mahallesinde sâkine ve zâtı vech-i şer‘î üzere mu‘arrefe olan işbu râfi‘atü’l-vesîka Havva bt. Mustafa nâm hatun meclis-i şer‘-i hatîrde bast-ı kelâm ve ifâde-i merâm edip işbu tahmînen altı yaşında olan Âişe bt. Mehmed nâm sagīrenin babası olmayıp anası Hadîce bt. Ali nâm hatun dahi fakīre olup infâkdan âcize olmağla sagīre-i mezbûreyi li-ecli’t-tebennî anası mezbûre bana teslîm edip ol vechile sagīre-i mezbûre Âişe hacr u terbiyemde olmağla men-lehû hakku’t-taleb ve’l-ahz üzerine kıbel-i şer‘den kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri dahi târîh-i kitâbdan külle yevm altışar akçe nafaka ve kisve-bahâ farz ve takdîr edip meblağ-ı mefrûz-ı mezkûru ber-vech-i muharrer sagīre-i mezbûreye harc ü sarfa ve lede’l-hâce istidâneye ve hîn-i zaferde men-lehû hakku’t-taleb ve’l-ahz üzerine rücû‘a mezbûre Havva Hatun’a izin vermeğin mâ-vaka‘a bi’t-taleb ketb olundu. Fî 20 Rebî‘ülâhir sene 1151 Şuhûdü’l-hâl: el-Hâc Hanefi b. Ali, Sar[ı] Mehmed b. İbrahim, es-Seyyid Süleyman b. Mehmed, Veli Bey b. Mehmed, Mustafa Bey b. Ahmed, Hasan Çelebi b. Ramazan.