Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 228 Hüküm no: 252 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Odabaşı’nın bazı eşyalarını hanımı Râbia Hatun’a sattığı Medîne-i Üsküdar’da Salacak mahallesinde sâkin Hasan Odabaşı b. Mehmed nâm kimesne meclis-i şer‘-i hatîrde zevcesi işbu râfi‘atü’l-vesîka Râbia bt. Mustafa <> nâm hatun mahzarında ikrâr ve takrîr-i kelâm edip silk-i mülkümde münselik eşyâ-i memlûkemden iki aded minder ve beş aded yastık ve iki aded köhne yorgan ve bir tencere ve üç aded sahan ve bir kilim ve bir leğen ma‘a ibrik ve iki aded beylik çukamı tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem mezbûre Râbia’ya on guruşa bey‘ [u] temlîk ve teslîm eylediğimde ol dahi ber-vech-i muharrer iştirâ ve kabûl ve temellük ve tesellüm eyledikden sonra semeni olan meblağ-ı merkūm on guruş mutâlebesinden zevcem mezbûre Râbia’nın zimmetini ibrâ ve iskāt eyledim fîmâ-ba‘d eşyâ-i muharrere-i mezkûre mezbûre Râbia’nın mülk-i müşterâsı olup benim kat‘â alâka ve medhalim kalmadı keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-şehri Rebî‘i’l-âhir li-seneti ihdâ ve hamsîn ve mi’ete ve elf. Şuhûdü’l-hâl: Mahmud Efendi b. İsmail el-İmâm, Yusuf b. Ahmed, Mehmed Ağa b. Mehmed, Halil b. Bayram, Mustafa Çelebi b. Abdullah, Veli Bey b. Mehmed, el-Hâc İbrahim, Mehmed Bey b. Murad Bölükbaşı.