Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 233 Hüküm no: 260 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer münasebetiyle Gebze menzilhanesine Genceli, Kandıra, Kaymas, Şeyhli, Şile, Taşköprü nahiyelerinden belirlenen miktarda imdad akçesi tahsili için Üsküdar kadısıyla Hassa bostancıbaşıya hüküm Akzâ kuzâti’l-Müslimîn evlâ vülâti’l-muvahhidîn ma‘denü’l-fezâil ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâ-i ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ Üsküdar kādısı —zîdet fezâiluhû— ve iftihârü’l-emâcid ve’l-ekârim câmi‘ü’l-mehâmid ve’l-mekârim el-muhtassu bi-mezîdi inâyeti’l-meliki’d-dâim hâlâ Hâssa bostancıbaşı ( ) -dâme mecdühû- ve mefâhirü’n-nüvvâbi’l-müteşerri‘în Genceli ma‘a Kandırı ve Kaymas ve Şeyhlü ve Şile ve Taşköprü nâibleri -zîde ilmühüm- tevkī‘-i refî‘-i hümâyûn vâsıl olucak ma‘lûm ola ki işbu sene-i mübârekede sefer-i hümâyûn takrîbi ile Gekbüze menziline umûr-ı mühimme ile mürûr eden ulakların kesretinden nâşî menzil-i mezbûrun el-yevm mukayyed olan yetmiş re’s bargiri idâresi hadd-i imkânda olmamağla menzil-i mezbûra bir mikdâr bargir zam ve imdâd verilmek için Gekbüze nâhiyesi nâibi i‘lâm etmeğin bundan akdem seferler vukū‘unda Genceli ma‘a Kandırı ve Kaymas ve Şeyhlü ve Taşköprü nevâhîleri menzil-i mezbûra imdâd eylemek üzere ta‘yîn olunduğu mukayyed bulunmağın işbu sene-i mübârekede sefer-i hümâyûn takrîbi ile menzil-i mezbûra umûr-ı mühimme ile mürûr [u] ubûr eden ulakların kesretinden nâşî menzil-i mezbûrun el-yevm mukayyed olan bargiri ile idâ[re]si hadd-i imkânda olmamağla sefer-i hümâyûn ber-taraf oldukda yine ref‘ olunmak şartıyla bin yüz elli bir senesi ruz-ı Hızırı’ndan elli iki senesi ruz-ı Hızır’a varıncayadek gerek nevâhî-i mezkûrlardan gerek taraf-ı mîrîden bir akçe taleb olunmayıp ve taleb ederlerse müsâ‘ade olunmamak şartıyla bundan akdem menzil-i mezbûra imdâdiye ta‘yîn olunan Genceli ma‘a Kandırı ve Kaymas ve Şeyhlü ve Şile nâhiyelerinde ale’s-seviye üçer yüz on dokuzar guruş ve Taşköprü nâhiyesinde dahi iki yüz yirmi dört guruş ki cem‘an bin beş yüz guruş imdâdiye ta‘yîn ve yerli yerinden cem‘a ve tahsîle ve umûmen menzilci nasb olunan Gekbüze ahâlîleri[ne] teslîm ettirilmek üzere bu def‘a ordu-yı hümâyûnum tarafından emr-i celîlü’ş-şânım sâdır olmağın imdi sen ki bostancıbaşı-i mûmâ-ileyhsin tarafından bir haseki mübâşir ta‘yîn ve işbu emr-i şerîf-i âlî-şânımda tasrîh olunduğu üzere nevâhî-i mezkûrlardan ta‘yîn olunan imdâdiyelerin ta‘yîn ve tasrîh olunduğu üzere bir gün evvel ve bir sâ‘at mukaddem yerli yerinden tahsîl olunan Gekbüze ahâlîlerinin muvâcehelerinde menzilci olan ( ) nâm kimesneden dahi …? teslîmine müş‘ir yedinden memhûr temessük alınıp Hazîne-i âmire’mde mevkūfât defterlerine kayd olunup ve eğer edâda ta‘allül ve muhâlefet olunur özr îrâdıyla umûr-ı mühimme ile vâki‘ olan ulakların meks ü tehîrine ve umûr-ı mühimmenin ta‘tîline bâ‘is olur ihtimâlleri olur ise bir vechile özr ü cevâbınız ısgā olunmayıp bi-eyyi hâlin imdâdiye ta‘yîn ve tasrîh olunduğu üzere yerli yerinden bir gün mukaddem ve bir sâ‘at akdem tahsîl ve teslîm olunmak üzere hareket ve işbu sâdır olan emr-i celîlü’ş-şânımın hilâfıyla vaz‘ u hareketden be-gāyet ihtizâr ve ictinâb eyleyesiz deyü fermânım olmuşdur buyurdum ki hükm-i şerîfimle ( ) vardıkda bu bâbda sâdır olan emrim üzere amel edip dahi sen ki bostancıbaşı-i mûmâ-ileyhsin vech-i meşrûh üzere husûs-ı mezbûra tarafından bir haseki mübâşir ta‘yîn ve işbu emr-i şerîf-i âlî-şânımda tasrîh olunduğu üzere bir gün evvel ve bir sâ‘at mukaddem yerli yerinden tahsîl ve ta‘yîn olunan Gekbüze ahâlîleri muvâcehelerinde menzil-i mezbûr menzilcisine tamâmen teslîm ve teslîmin[i] müş‘ir Hazîne-i âmirem defterlerine kayd için arz ve i‘lâm ve eğer edâda ta‘allül ve özr îrâdıyla vâki‘ olan ulakların tehîr ve umûr-ı mühimmenin ta‘tîl ve tehîrine bâ‘is olmak ihtimâli olur ise bir vechile özr ü cevâbları ısgā olunmayıp bi-eyyi hâlin lâzım gelen imdâdiyelerin tahsîl ve işbu sâdır olan emr-i âlî-şânımın hilâfıyla vaz‘ u hareketden be-gāyet ihtirâz eyleyesiz şöyle bilesiz alâmet-i şerîfe i‘timâd kılasız. Tahrîren el-yevmü’s-sâlis aşer min-[R]ebî‘i’l-evvel li-seneti ihdâ ve hamsîn ve mi’ete ve elf. Kostantıniyyeti’l-mahrûse