Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 237 Hüküm no: 265 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beşir Ağa çiftliği mutasarrıfı Kâtib Ahmed Efendi ile çiftlik komşusu Ebubekir Efendi’nin mera davaları Husûs-ı âti’l-beyânın mahallinde istimâ‘ ve fasl ü hasmi’çün hâlâ bâb nâibimiz olan el-Hâc Mehmed Efendi b. Ahmed ta‘yîn ve irsâl olunmak üzere bâ-işâret-i aliyye bu fakīr müvellâ olmak bâbında sâdır olan fermân-ı âlîye imtisâlen savb-ı şerî‘at-i garrâdan mevlânâ-yı mûmâ-ileyh irsâl olunup ol dahi zeyl-i vesîkada muharrerü’l-esâmî ve sâir cemm-i gafîr ve cem‘-i kesîr Müslimîn ile vilâyet-i Anadolu’da İznikmid kasabası civârında Kilaz? köprüsü kurbünde vâki‘ münâza‘un-fîh olan mahallin üzerine varıp akd-i meclis-i şer‘-i kavîm eyledikde Evrenkös? hâssı demekle şehîr hâs arâzisinde vâki‘ Kadıköy çiftliği demekle arîf netîcesi Haremeyn-i muhteremeyn’e meşrûta vakıf çiftliğin ber-vech-i iştirâk mutasarrıfları işbu bâ‘isiyyü’l-vesîka el-Hâc Ebubekir Efendi b. Ali nâm kimesne kendi tarafından asâleten ve zevcesi Şerife Âişe Hatun tarafından vekîl-i müsecceli olmağla vekâleten meclis-i ma‘kūd-ı mezkûrda vakf-ı mezbûr mütevellîsi tarafından vekîl-i şer‘îsi Ahmed Çelebi b. Abdurrahman hâzırân olduğu hâlde merhûme Emine Hatun Vakfı olup Beşir Ağa çiftliği demekle ma‘rûf harâb çiftlik arsasına Haremeynü’ş-şerîfeyn Vakfı tarafından icâreteynle mutasarrıf Kâtib el-Hâc Ahmed Efendi b. Mehmed b. Ali nâm kimesne tarafından ber-vech-i âti husûmet ve redd-i cevâba vekîl-i sâbitü’l-vekâlesi Hasan b. Mehmed nâm kimesne mahzarına üzerine da‘vâ ve takrîr-i kelâm edip işbu mu‘âyene ve rü’yet olunduğu üzere bir tarafdan Tuzla hendeği ve bir tarafdan Başiskele’ye giden kaldırım ve ba‘zan mârrü’z-zikr Kilaz? köprüsü kurbünde müvekkil-i merkūm Kâtib el-Hâc Ahmed Efendi tasarrufunda olup Harman tarla demekle meşhûr tarla ve bir tarafdan leb-i deryâ ile sâlifü’z-zikr Tuzla hendeğine müntehî işbu hudûd ile mahdûd olan mer‘â-yı kadîm ale’l-iştirâk mutasarrıf olduğumuz çiftliğin müşterek mer‘â-yı kadîmi olup ra‘y-i hayvanât ile iktisâb-ı menâfi‘de müşterek iken tasarrufunda olan mârrü’z-zikr Beşir Ağa çiftliğinin vekîl-i mezbûr el-Hâc Hasan hâlâ mer‘â-yı merkūmda ra‘y-ı hayvanâtile iktisâb-ı menâfi‘ime mümâna‘at eder suâl olunup ber-vech-i muharrer mümâna‘atı men‘ ü def‘ olunmak murâdımdır dedikde gıbbe’s-suâl vekîl-i mezbûr cevâbında işbu hudûd ile mahdûd mer‘â müvekkil-i merkūm Kâtib el-Hâc [Ahmed] Efendi’nin çiftliğinin mahsûs mer‘âsı olup müdde‘î-i mezbûr el-Hâc Ebubekir Efendi’nin tasarrufunda olan Kadıköy çiftliği beyninde müşterek kadîmî mer‘â olduğunu inkâr edicek müdde‘î-i mezbûr el-Hâc Ebubekir Efendi müdde‘âsını mübeyyine beyyine taleb olundukda udûl-ı ahrâr-ı ricâl-i Müslimînden kasaba-i mezbûre ve civârında vâki‘ kurâ ahâlîsinden hâzırûn bi’l-meclis olan müsinn ü ihtiyârlardan İbrahim Ağa b. Mehmed ve es-Seyyid el-Hâc Mehmed b. Hasan ve Mustafa b. Veli ve el-Hâc Halil Ağa b. Mehmed ve Ahmed Ağa b. el-Hâc Ali ve Ahmed Beşe b. Mehmed ve el-Hâc Mustafa b. Hüseyin ve el-Hâc İsmail b. Veli ve Ali Beşe b. Mehmed ve Hüseyin Beşe b. Halil ve Süleyman b. Halil ve Halil Beşe b. İsmail ve Feyzullah Çelebi b. el-Hâc Ahmed ve Ömer Efendi b. İsmail ve Mehmed Beşe b. Reis Mustafa ve Ali Beşe b. Ali Yazıcı ve Ekmekçibaşı İsmail Ağa b. Uzun Ali ve Süleyman b. İsmail ve Halil Beşe b. İsmail ve Midillili Halil Ağa ve Paşalı Mehmed Ağa b. Veli ve Mehmed Ağa b. Mustafa ve el-Hâc Hüseyin b. Abdullah ve Balcı Mehmed Çelebi b. Mustafa ve İbrahim Kethüdâ ve Abdullah Bey b. el-Hâc Ahmed Ağa ve Süleyman Çelebi b. Halil ve Ahmed b. Münir Efendi ve el-Hâc Mustafa Odabaşı ve diğer el-Hâc Mustafa ve Abacı Ahmed Çelebi b. Hasan ve Ahmed Beşe b. İsmail ve Ömer b. İsmail ve es-Seyyid Ahmed ve Kaba Ömer b. Abdullah ve sâir mazbûtü’l-esâmî iki yüz neferden [69b] mütecâviz bî-garaz Müslimîn istihbâr ve istişhâd olunduklarında fi’l-hakīka işbu mu‘âyene ve rü’yet olunduğu üzere bir tarafdan Tuzla hendeği ve bir tarafdan Başiskele’ye giden kaldırım ve ba‘zan mârrü’z-zikr Kilaz? [köprü]sü kurbünde vâki‘ vekîl-i mezbûrun merkūm Kâtib Ahmed Efendi tasarrufunda olan Harman tarla ve bir tarafdan nehr-i Kilaz? köprüsü ve bir tarafdan leb-i deryâ ile sâlifü’z-zikr Tuzla hendeğine müntehî işbu hudûd ile mahdûd olan mer‘â-yı kadîmi müvekkil-i merkūm Kâtib Ahmed Efendi’nin mutasarrıf olduğu Beşir Ağa çiftliği ile müdde‘î-i mezbûr el-Hâc Ebubekir Efendi’nin ale’l-iştirâk mutasarrıf olduğu Kadıköy çiftliğinin ber-vech-i iştirâk mer‘â-yı kadîmi olup ra‘y-ı hayvanâtile iktisâb-ı menâfi‘i zikr olunan mer‘â sâlifü’l-beyân iki aded çiftliğin ale’l-iştirâk kadîm mer‘âsıdır biz [bu] husûsa bu vech üzere şâhidleriz şehâdet dahi ederiz deyü her biri alâ-tarîkı’ş-şehâdeti ve’t-tevâtür şehâdet-i şer‘iyye eylediklerinde mûcebince ba‘de’l-hükm müdde‘î-i mezbûr el-Hâc Ebubekir Efendi yedinde olan fetvâ-i şerîfe mantûkunca mer‘â-yı mezkûrda ra‘y-ı hayvanâtile iktisâb-ı menâfi‘de müşterek olmağla vekîl-i mezbûrun müvekkil-i merkūm Kâtib el-Hâc Ahmed Efendi mümâna‘at etmemek üzere ba‘de’t-tenbîh vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s [olunan] ümenâ-i şer‘le meclis-i şer‘a gelip alâ-vukū‘ihi inhâ ve ihbâr ve takrîr etmeğin mâ-vaka‘a bi’l-ibtigā ketb olundu. Fî-evâili Muharremi’l-harâm li-seneti hamsîn ve mi’ete ve elf. Şuhûdü’l-hâl: Eş-şâhidûn ve’s-sâbikūn. Kâğıd 15 aded