Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 236 Hüküm no: 264 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’da altı bölük yoldaşlarının üzerine Sipahi Ahmed’in kethüdayeri tayin edildiği İzzetlü sa‘âdetli semâhetli fazîletlü efendi hazretlerinin meclis-i şerîflerine dürer-i da‘avât-ı sâfiyat ithâfıyla inhâ olunan oldur ki hâlâ taht-ı hükûmet-şi‘ârınızda vâki‘ olan Üsküdar ve tevâbi‘ nevâhîlerinde sâkin ve mütemekkin olan altı bölük yoldaşlarının üzerlerine zâbit ve kethüdâyeri nasb u ta‘yîn olunmak mu‘tâd-ı kadîm olmağla ebnâ-yı sipâhiyândan altıncı bölük yoldaşı on altı akçe ulûfeye mutasarrıf olan kıdvetü’l-emâsil ve’l-akrân Ahmed [b.] Süleyman -zîde kadruhû- mahal ve müstahak olmağla müceddeden zâbit ve kethüdâları [kethüdâyeri] nasb u ta‘yîn olunmağın işbu mektûb tahrîr ve irsâl olunmuşdur inşâallâhu te‘âlâ vusûlünde gerekdir ki mûmâ-ileyhi hizmet-i merkūmede istihdâm edip kethüdâyeri umûrunda mürâca‘atı mûmâ-ileyhe ettirdesiz ve sizler ki ol câniblerde sâkinân ve mütemekkinân olan altı bölük yoldaşlarısız mûmâ-ileyhi üzerlerinize zâbit ve kethüdâyeri bilip düşen da‘vâ ve nizâ‘ınızı merkūmun ma‘rifeti ve ma‘rifet-i şer‘le görüp şerî‘at-i garrâya kemâl-i itâ‘at ve mûmâ-ileyhe inkıyâd üzere hareket eyleyesiz ve sen ki kethüdâyeri -zîde kadruhû-sun ol havâlîlerde sâkin[în] ve mütemekkinîn olan altı bölük yoldaşlarından sahîhü’l-esâmî olanlar ve sipâh-benâm? ve tekā‘üdleri bundan akdem şeref-sudûr eden fermân-ı celîlü’ş-şân mûcebince hitâm? olunaverilmeyip töhm[et-i] şer‘iyye ile müttehem olanları ber-muktezâ-yı şer‘-i kavîm zâbiti ma‘rifetiyle cezâ-yı şer‘îleri tertîb oluna sipâh ve sipâhizâde olmayıp bu makūle olanlara sâhib çıkılmayıp ve bundan kadîm mürâ‘at edip mukaddemâ sâdır olan fermân-ı âlî-şânın mazmûn-ı âlîsi üzere amel ve hareket ve hilâfından be-gāyet ihtirâz ve ictinâb edip mûcib-i mektûb ile âmil olasız. Tahrîren fî-evâsıtı Zilhicce li-seneti hamsîn ve mi’ete ve elf. Mehmed Emin Ağa bölük-i silahdâr, el-Hâc Mustafa Ağa altıncı bölük-i sipâhiyân.