Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 242 Hüküm no: 269 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşköprü’nün bazı köylerinden Üsküdar taraflarına gelip yerleşenlerden on seneyi doldurmamış olanlarının köylerine iadeleri Akzâ kuzâti’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâ-i ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ Üsküdar kādısı —zîdet fezâiluhû- ve mefâhirü’l-kuzât ve’l-hükkâm ma‘denü’l-fezâil ve’l-hükkâm ( ) ve ( ) kādıları —zîde fazluhâ— tevkī‘-i refî‘-i hümâyûn vâsıl olucak ma‘lûm ola ki medîne-i Üsküdar kazâsı muzâfâtından Taşköprü nâhiyesine tâbi‘ erbâb-ı timâr karyelerinden Yaycılar ve Demirciler ve Halilli nâm karyeler sipâhileriyle kurâ-i merkūm ahâlîsi meclis-i şer‘a varıp zikr olunan Yaycılar karyesi re‘âyâlarından Karacaoğlu Mehmed’in oğlu Halil ve Doğancıoğlu İbrahim ve Demirci karyesi re‘âyâlarından Durmuş oğlu Halil ve Halilli karyesinden Kocakarı oğlu İsmail ve karındaşı Süleyman ve Çoban Receb oğlu Hasan ve karındaşı Mehmed ve Ali ve Kocabaşoğlu Hasan ve sâir otuz neferden mütecâviz kimesneler kurâ-i mezbûrenin defterde mukayyed ra‘iyyet ve ra‘iyyeti oğullarından olduğu zâhir olmuş iken mezbûrlar altı yedi seneden beri kadîmi karyelerin terk ve tekâlîflerin vermemek için taht-ı kazânızda vâki‘ kasabât ve kurâda sâkin olmalarıyla bâ-fermân-ı âlî vâki‘ olan tekâlîfden hisseleri sâir re‘âyâ fukarâsı üzerlerine tahmîl olunduğundan kemâl-i mertebe mutazarrır ve cümlesinin perâkende ve perîşân olmalarına bâ‘is ve ol vechile ahvâl-i fukarâ diğer-gûn olmağın kurâ-i merkūmenin ol makūle defterli re‘âyâları bulundukları yerlerde sipâhileri ma‘rifetleriyle kānûn üzere kaldırılıp kadîmi karyelerine nakl ve iskân ettirilmek üzere bundan akdem iki kıt‘a emr-i âlî sâdır ve cânib-i şer‘den mürâsele tahrîr ve irsâl olundukda adem-i itâ‘atlerinden nâşî te‘addî ve muhâlefet üzere oldukları nâhiye-i mezbûr ahâlîsinden cemm-i gafîr ve cem‘-i kesîr nâhiye-i mezkûr nâibi Mevlânâ Ahmed —zîde ilmühû—ya varıp haber vermeleriyle re‘âyâ-yı mezkûr mukaddemâ sâdır olan emr-i âlî mûcebince sipâhileri ma‘rifet[iy]le bi-eyyi hâlin kaldırılıp kadîmi karyelerine nakl ü iskân ettirilmek bâbında emr-i şerîf sudûri’çün sen ki Üsküdar kādısı Mevlânâ Mehmed -zîdet fezâiluhû-sun i‘lâm etmenle kānûn üzere amel olunmak emrim olmuşdur buyurdum ki ( ) hükm-i şerîfimle vusûl buldukda bu bâbda sâdır olan emrim üzere amel edip dahi husûs-ı mezbûra tamâm mukayyed ve kurâ-i merkūm sipâhilerinden Südde-i sa‘âdetimden ihrâc olunmuş mühürlü sahîh sûret-i defter-i cedîd-i hâkānî taleb edip göresin i‘lâm olunduğu üzere evvel göçüp giden re‘âyâ-yı kurâ-i merkūmenin defterde mukayyed ra‘iyyet ve ra‘iyyeti oğullarından iken kadîmi karyelerinden kalkıp varıp hâlâ sâkin oldukları yerlerde avârızhânesine kayd olmayıp ve sâkin olalı on sene geçmiş değil ise kaldırıp kadîmi karyelerine nakl ve iskân ettirdesin ammâ sâkin oldukları yerlerde avârızhânesine kayd olup ve sâkin olalı on sene geçmiş ise ol makūle defterli re‘âyâ kaldırılmak olmaz sâkin oldukları yerlerde üzerlerine edâsı lâzım gelen rüsûm-ı ra‘iyyetlerini kānûn ve defter mûcebince hükmedip sipâhilerine alıverip min-ba‘d kānûn ve deftere ve emr-i hümâyûnuma muhâlif kimesneye iş ettirmeyip eslemeyeni yazıp bildirip husûs-ı mezbûr için [71b] bir dahi emr-i şerîfim ısdâr olmalı eylemeyesin şöyle bilesin alâmet-i şerîfe i‘timâd kılasın. Tahrîren fî-evâhiri Zilka‘de li-seneti hamsîn ve mi’ete ve elf.