Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 241 Hüküm no: 268 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer için orta koldaki kazalardan talep edilen develerin Edirne sahrasına ulaştırılmasıyla ilgili ferman kaydı Ve mefâhirü’l-kuzât ve’l-hükkâm ma‘denü’l-fezâil ve’l-kelâm Üsküdar’dan orta kolun nihâyetine varınca vâki‘ olan kazâların kādıları —zîde fazluhum— ve mefâhirü’l-emâsil ve’l-akrân a‘yân-ı vilâyet iş erleri —zîde kadruhüm— tevkī‘-i refî‘-i hümâyûn vâsıl olucak ma‘lûm ola ki işbu sene-i mübârekede sefer-i hümâyûn-ı nusret-makrûnum için zikr olunan kazâlardan ihrâcı fermânım olan mekkârî develeri bu vakte dek ordu-yı hümâyûn-ı nusret-makrûnuma erişmesi me’mûl ve muntazır iken henüz tekmîlen erişmeyip sâir mekkârî tâifesinin mücerred mel‘anet ve habâsetlerinden yolda beyhûde meks ve ikāmet üzere oldukları yakīnen haber alınmağla el-hâletü hâzihi ordu-yı hümâyûnum müsta‘înen billâhi te‘âlâ işbu mâh-ı Muharremi’l-harâm’ın onuncu günü Edirne sahrâsından savb-ı maksûda hareket ve azîmet eylemek zikr olunan kazâlardan ihrâcı fermânım olan mekkârî develerinden gerek esnâ-i tarîkde ve gerek mahallinde bulunan develeri sür‘at ve şibâb [şitâb] ile ordu-yı hümâyûnum tarafına irsâl ve tesyîri akzâ-yı murâd-ı hümâyûnum olmağla imdi siz ki kazâlar [kādılar] ve a‘yân-ı vilâyet ve iş erlerisiz Dersa‘âdetim’den mübâşir ta‘yîn olunan Mustafa Çavuş ve bostâniyân hasekilerinden Halil Haseki —zîde kadruhümâ— işbu emr-i şerîfimle vardıklarında zikr olunan develeri gerek esnâ-i tarîkde bulunan develeri alâ-eyyi hâlin ihrâc ve sür‘at ve şibâb [şitâb] ile ordu-yı hümâyûnum tarafına irsâl ve tesyîr ettirip teahhur ve tevakkuflarına rızâ ve cevâz gösterilmekden be-gāyet ihtirâz ve ictinâb eylemeniz bâbında fermân-ı âlî-şânım sâdır olmuşdur buyurdum ki hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i celîlü’ş-şân-ı vacibü’l-ittibâ‘ [ve] lâzımü’l-imtisâlimin mazmûn-ı itâ‘at-makrûnuyla âmil olup hilâfından be-gāyet ihtirâz ve ictinâb eyleyesiz şöyle bilesiz alâmet-i şerîfe i‘timâd kılasız. Tahrîren fi’l-yevmi’t-tâsi‘ şehr-i Muharremi’l-harâm li-seneti ihdâ ve hamsîn ve mi’ete ve elf. El-mahrûsetü’l-Kostantıniyye