Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 336 Hüküm no: 334 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hatun bt. Hüseyin Ağa’nın evini yeniden bina olunmak üzere Keresteci Toros’a sattığı Husûs-ı âti’z-zikrin mahallinde ketb ü tahrîri için bi’l-iltimâs savb-ı şer‘-i kavîmden irsâl olunan başkâtibimiz Mevlânâ Mustafa Efendi b. el-merhûm Yunus Efendi zümre-i silâhdârândan olup mahmiye-i İstanbul’da Sancakdâr Hayreddin Mahallesi sükkânından Halil Çavuş Ağa b. İbrahim Çavuş’un menziline varıp zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i şerîf ettikde mezbûrun zevce-i menkûhası olup zâtı Ahmed Ağa b. Mustafa ve Osman Beşe b. İsmail ta‘rîfleriyle mu‘arrefe olan Hadice Hatun bt. Hüseyin Ağa meclis-i ma‘kūd-ı mezkûrda bâ‘isü hâze’s-sifr Keresteci Toros v. Rohan v. Aranik nâm Ermeni tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i müdde‘î üzere sâbit olan Arakil v. Manuk nâm Ermeni muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahmiye-i mezbûrede Koca Mustafapaşa Mahallesi’nde vâki‘ iki tarafdan Çorbacı Ali Ağa mülkü ve bir tarafdan Şeyh Süleyman Efendi tasarruflarında olan dükkânlar ve bir tarafdan tarîk-i âm ile mahdûd hâriciyyesinde fevkānî iki oda ve bir sofa ve kenîf ve tahtında ahır ve bi’r-i mâ ve kenîf ve dâhiliyesinde fevkānî iki bâb oda ve bir sofa ve kenîf ve tahtânî bir oda ve kilâr ve matbah ve eşcâr-ı müsmire ve gayr-ı müsmireli mülk menzilim müşrif-i harâb olup ta‘mîr ve termîmine iktidârım olmamağın müvekkil-i mezbûr Keresteci Toros müceddeden Müslim menzilleri binâ ve ihdâs etmek üzere ta‘ahhüd etmekle menzil-i mezkûru bi-cümleti’t-tevâbi‘ ve’l-levâhık ve kâffe-i hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile müvekkil-i mezbûr Keresteci Toros’a sekiz yüz seksen guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semen-i olan meblağ-ı mezbûr sekiz yüz seksen guruşu müvekkil-i mezbûr mâlından olmak üzere vekîl-i mezbûr yedinden tamamen ahz u kabz eyledim. Min-ba‘d menzil-i mezkûr müvekkil-i mezbûr Keresteci Toros’un mülk-i müşterâsı olup benim kat‘â alâka ve medhalim kalmadı. Keyfemâ-yeşâ mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Abdünnebi b. Nuh ve Molla Ali b. Mahmud ile meclis-i şer‘a gelip takrîri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ işrîn min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mehmed Efendi b. Osman, Halil Çelebi b. Mustafa, İsmail Efendi b. Ali, Ahmed Çelebi b. Mustafa, Osman Çelebi b. İsmail, Halil Çavuş Ağa b. İbrahim, Süleyman Çelebi b. Ahmed, İsmail Beşe b. Mustafa, el-Hâc Hüseyin b. Halil, Attâr Mustafa Çelebi b. ( ).