Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 337 Hüküm no: 335 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Ebûbekir Efendi’nin arsasını İbrahim Çelebi b. Hüseyin’e sattığı Husûs-ı âti’l-beyânın mahallinde ketb ü tahrîri için bi’l-iltimâs cânib-i şer‘den irsâl olunan keşif nâibimiz Mevlânâ Yusuf Efendi b. el-merhûm Mustafa Efend[i] hâssa mi‘mârlarından Ali Halîfe b. Ahmed ve Şa‘ban Halîfe b. Mahmud ile mahmiye-i İstanbul’da Koca Mustafapaşa Mahallesi’nde vâki‘ Mehmed Efendi b. Ebûbekir Efendi’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde merkūm Mehmed Efendi meclis-i ma‘kūd-ı mezkûrda işbu bâ‘isü’l-kitâb İbrahim Çelebi b. Hüseyin mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan David v. Vartan nâm zimmî tasarrufunda olan menzil ve bir tarafdan mezbûr İbrahim Çelebi menzili ve ba‘zan kendi âhar mülküm ve bir tarafdan kefere sâkin olduğu odalar ve bir tarafdan tarîk-i âm ile mahdûd ve ma‘lûmü’l-müştemilât işbu akd-i meclis-i şer‘-i şerîf olunan menzilimin merkūm David ve tarîk-i âm tarafından mi‘mârân-ı mezbûrân mesâhaları üzere tûlen on dokuz zirâ‘ on yedi parmak ve arzen üç buçuk bi-hesâb-ı terbî‘i altmış dokuz zirâ‘ arsa ve üzerinde fevkānî bir kenîf ve bir mağsel ve bir mikdâr dehlîz ve tûlen yirmi üç buçuk zirâ‘ taş duvarı bi’l-cümle müştemilâtıyla ba‘de’l-ikrâz ve’t-ta‘yîn tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile merkūm İbrahim Çelebi’ye dokuz bin yedi yüz akçeye bey‘ ve temlîk ve teslîm edip ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr dokuz bin yedi yüz akçe mütâlebesinden merkūm İbrahim Çelebi’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim. Fîmâ-ba‘d merkūm İbrahim Çelebi’nin mülk-i müşterâsı olup keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb <> ve tahrîr ba‘dehû ma‘an ba‘s olunan Çukadâr Mahmud Çelebi b. Receb ve Mustafa Çelebi b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Mustafa b. el-Hâc Ali, Süleyman Çavuş Ağa b. Ca‘fer, Osman Efendi b. Ömer, Mustafa Çelebi b. Mehmed, Mustafa Çelebi b. Ömer. [75b] Sa‘âdetli ve fazîletli veliyyü’n-ni‘am Mektûbî Abdurrahman Efendi hazretlerinin zamân-ı sa‘âdetlerinde olan vekāyi‘dir.