Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 243 Hüküm no: 271 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar ve havalisindeki sipahiler ve silahdarların orduya katılmalarının sağlanması Üsküdar kādısı fezîletlü efendi İnşâallâhu te‘âlâ ordu-yı hümâyûn-ı zafer-makrûn Cuma günü savb-ı maksûda hareket eylemek üzere olmağla Üsküdar ve havâlîsinde sâkin olan sipâh ve silahdâr neferâtı dahi geriye kalmayıp ordu-yı hümâyûn ile ma‘an azîmet eylemeleri mûcebince ve muktezâsı olmağın imdi Üsküdar ve müzâfâtı olan mahallerde sâkin olan sipâh ve silahdâr neferâtı ordu-yı hümâyûndan geriye kalmayıp savb-ı memûrlarına ma‘an gitmek üzere muhkem tenbîh ve te’kîd ve bundan sonra dahi mütenebbih olmayanların esâmîleri hazîne-mânde olunmağla kifâyet olunmayıp tertîb-i cezâ olunacakları neferât-ı mezkûreden mahallelerinde sâkin olanlara ifhâm için bi’l-cümle mahallerde imâmların huzûr-ı şer‘a da‘vet ve her birine i‘lân ve işâ‘a eyleyesin deyü buyruldu. Fî 11 Zilhicce sene 1150