Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 249 Hüküm no: 279 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gayrimüslimlerin Müslüman kıyafetleri giymelerinin yasak olduğu İzzetlü bostancıbaşı ağa Ehl-i zimmet kefere ve Yehûd tâifeleri kendülere mahsûs olan kisveler ile gezip al ve kırmızı kalpak ve şe‘âir-i ehl-i İslâmdan olan al çakşır ve nîmten ve fes ve sarı mest ve papuç ve altı yaprak ta‘bîr olunur şalvar ve yemenî giymemek için bundan akdem fermân-ı âlî sâdır olup hilâfına vaz‘ u hareket îcâb etmez iken içlerinden ba‘zıları hilâf-ı emr-i âlî câ-be-câ al kalpak ve al çakşır ve sarı mest ve papuç giydikleri müşâhede olunmağla imdi ba‘de’l-yevm tâifeteyn-i <> mesfûreteynden kisâ-i mahsûsalarıyla gezmeyüp al kalpak ve şe‘âir-i ehl-i İslâmdan olan al çakşır ve sarı mest ve papuç ve nîmten ve yemenî ve altı yaprak ta‘bîr olunur şalvar ve fes iktisâ eyleyenleri bi-eyyi hâlin ahz ve itâ‘at-i emr-i âlî eylemedikleri’çün bilâ-emân cezâları tertîb ve icrâ olunmak üzere huzûrumuza ihzâr eyleyip hilâfından be-gāyet tevakkī ve mücânebet eyleyesin deyü buyruldu. [Fî] 28 N Sene [1]150