Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 251 Hüküm no: 281 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar mezarcılarının kazdıkları mezarlardan belirlenen ücretten fazla para almamasına dair ferman kaydı Kıdvetü’n-nüvvâbi’l-müteşerri‘în Üsküdar kazâsında nâibü’ş-şer‘ olan mevlânâ -zîde ilmühû- tevkī‘-i refî‘-i hümâyûn vâsıl olucak ma‘lûm ola ki sen ki mevlânâ-yı mûmâ-ileyh es-Seyyid el-Hâc Mehmed -zîde ilmühû-sun Südde-i sa‘âdetime mektûb gönderip Üsküdar ahâlîsinden cemm-i gafîr ve cem‘-i kesîr meclis-i şer‘a varıp kadîmü’l-eyyâmdan beri vâki‘ olan mevtâ-i Müslimînin kubûrunu hafr için mezârcılara ta‘yîn olunan ücret esnaf-ı selâse i‘tibârıyla kebîrinden yirmi para ve evsatından on beş para ve sagīrinden on para olup ber-vech-i muharrer had vaz‘ olunmuş iken hâlâ mezârcı tâifesi hadd-i merkūmu tecâvüz ve her bir kabir için altmışar, seksener para ücret taleb ü ahz ve ümmet-i Muhammed’i ta‘cîz ve fukarâ-i Müslimîne cevr ü eziyet ederler deyü ihbâr etmeleriyle ke’l-evvel mezârcı tâifesi hafr eyledikleri kubûrun ücretlerine hadd-i mezkûre üzere olup kadîme mugāyir ziyâde akçe talebiyle bir ferdi rencîde etmemeleri bâbında düstûrü’l-amel olmak için emr-i âlî-şânım recâ eylediklerin bi’l-iltimâs i‘lâm eylediğin ecilden i‘lâmın mûcebince amel olunmak bâbında fermân-ı âlî-şânım sâdır olmuşdur buyurdum ki emr-i şerîfim vusûl buldukda bu bâbda sâdır olan fermân-ı celîlü’l-kadrim mûcebince amel dahi ke’l-evvel mezârcı tâifesi hafr eyledikleri kubûrun ücretleri hadd-i mezkûr üzere olup kadîme mugāyir ziyâde akçe talebiyle bir ferdi rencîde ettirmeyip ve bu emr-i âlî-şânımı düstûrü’l-amel tutup mazmûn-ı emr-i şerîfimle âmil olasın şöyle bilesin alâmet-i şerîfe i‘timâd kılasın. Tahrîren fî-evâhiri Ramazan li-seneti hamsîn ve mi’ete ve elf. [Be-makām-ı] Kostantıniyyetü’l-mahrûse