Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 252 Hüküm no: 283 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya’ya karşı sefere çıkılacağından Anadolu’nun sol kolundaki tüm vali ve ümeranın maiyyetindeki birliklerle Kırım’a sevk edilmek üzere belirlenen iskelelerde hazır bulunmalarına dair ferman kaydı Akzâ kuzâti’l-Müslimîn evlâ vülâti’l-muvahhidîn ma‘denü’l-fezâil ve’l-yakīn râfi‘u a‘lâmi’ş-şerî‘ati ve’d-dîn vârisü ulûmi’l-enbiyâ-i ve’l-mürselîn el-muhtassu bi-mezîdi inâyeti’l-meliki’l-mu‘în Anadolu’nun sol kolu nihâyetine varıp gelince vâki‘ olan mevâlî-i izâm -zîde fazluhum- ve mefâhirü’l-kuzât ve’l-hükkâm ma‘denü’l-fezâil ve’l-kelâm kuzât ve nüvvâb -zîde fazluhum- ve mefâhirü’l-emâsil ve’l-akrân yeniçeri serdârları ve ocak ihtiyârları ve serdengeçdi ağaları ve bayrakdârları ve a‘yân-ı vilâyet iş erleri -zîde kadruhüm- tevkī‘-i refî‘-i hümâyûn vâsıl olucak ma‘lûm ola ki a‘dâ-yı dîn ü Devlet-i aliyye olan Moskov ve Nemçe kefereleri devlet-i ebed-müddetim ile cânibeynde ma‘kūd olan sulh u salâhı nakz ve ahkār ve birbiri ile ittihâd ve istizhâr ederek “El-küfrü milletün vâhidetün” muktezâsınca memâlik-i İslâmiyyeyi istîlâ eylediklerine binâen “Kātilü’llezîne yelûneküm mine’l-küffâr” nass-ı celîlü’l-kadr üzere bi-inâyeti’l-meliki’l-allâm dîn-i İslâm’dan kat‘-ı eyâdî-i a‘dâ-yı li‘âm için ber-muktezâ-yı şer‘-i şerîf üzerlerine varılmak katı‘be-i ehl-i ma‘lûm üzerlerine şer‘an lâbüd ve lâzım ve “el-mü’minîne ahu’l-mü’min” müfâdınca hamiyyet-keşân-ı nâmûs-ı şerî‘at-i Ahmedî olan âmme-i ibâd-ı muvahhidîne dahi birbirleriyle tekāsüd ve tesânüd vâcib ve mütehattim olmakdan nâşî “ve câhidû bi-emvâliküm ve enfüsiküm fî sebîlillâh” emr-i şerîfine “Ennehu evvele kutile ve urûki’l-vüskā [urveti’l-vüskā] ve men-yetevekkel alallâhi fehüve hasbühû”ya vukūf ve ittikâl ile ümmete farîza-i cihâd ve gazâ ve i‘lâ-i kelimetullâh-ı ulyâ ve hamiyyet-hımâ-yı şerî‘at-i garrâ için evvel bahâr-ı huceste-âsârda Moskov keferesinin üzerine ta‘yîn olunmak üzere Kırım adasında Kefe cânibinde ser-askeri ma‘iyyetinde tahzîr ve ihtişâd edecek ecnâd-ı zafer-i‘tiyâm-ı İslâmiyye ve cüyûş-ı deryâ-hurûş-ı Tatar-ı adüvv şikâr ve deryâ kapudanı ma‘iyyetiyle bahren memûr kılınan donanma-i hümâyûnum kalyonları ve ince donanma sefîneleri asâkirinden mâ‘adâ Bender tarafına dahi berren asâkir-i vâfire ve top ve havan ve sâir mühimmât-ı mütekâsire ile müstakıllen ser-asker ta‘yîn olunup ancak Kırım içinde asâkir-i nusret-şi‘âr teksîr ve tevfîrleriyle bi-fazlillâhi’l-meliki’l-müste‘ân Moskov keferesinden gereği gibi ahz-ı intikām için bu sâl-i meymenet-iştimâlîde sefer-i nusret-âsâra guzât-ı muvahhidînin hâzır ve âmâde olmalarına bundan akdem haberci mübâşirler gönderilmişdi evvel bahâr karîb olmakdan nâşî Anadolu sol kolu kazâlarında sâkin atîk ve cedîd serdengeçdi ağalarından kâr-güzâr ve neferât i‘mâline sâhib-i iktidâr yüz aded serdengeçdi ağalarının bayrakların küşâde ve her birlerinin bayrakları altında tâmmü’s-silah yüz yirmişer nefer mevcûd yeniçeri dilâverleriyle serdârlar dahi kazâlarında bulunan sahîhü’l-esâmî ve esâmîsi çalık yeniçeri ve tüvânâ kul oğullarından bir ferdini geriye komamak şartıyla cümlesin bayrakları altında cem‘ ve nevrûz-ı fîrûzdan evvelce yerlerinden kalkıp sevâhil-i Bahr-i Siyâh’da beş aded iskelelerde emr-i şerîf-i âlî-şânım ile hâzır ve âmâde kılınan sefînelere süvâr ve bi-lütfihî te‘âlâ bir gün evvel Kırım içinde ser-asker paşa ma‘iyyetiyle kul kethüdâsı bulunduğu mahalle varıp a‘dâ-yı dûzah-karârın kahr ü tedmîrleri’çün bezl-i iktidâr eylemeleri fermânım olmağın husûs-ı mezbûra kıdvetü’l-emâcid ve’l-a‘yân ( ) el-Hâc Ali -zîde mecdühû- sürücü mübâşir ta‘yîn ve irsâl olunmağla sen ki mübâşir-i mûmâ-ileyhsin sen emekdâr ve sadâkatkâr olup [76b] hıdemât-ı lâzıme uhdesinden gelmeğe sâhib-i iktidâr olduğun ecilden bu umûr-ı mühimme müstakıllen mübâşir ta‘yîn olunmuşsundur imdi bir an evvel varıp fermân olunduğu vech üzere Anadolu sol kolu kazâlarında sâkin atîk ve cedîd serdengeçdi ağalarından kâr-güzâr ve mücerrebü’l-etvâr olup neferât i‘mâline sâhib-i iktidâr olanlardan cümle ma‘rifetleri ve ma‘rifet-i şer‘le yüz aded serdengeçdi ağalarının bayrakları küşâd ve her birlerinin bayrakları altına yüz yirmişer nefer yeniçeri dilâverleri tahrîr ve tekmîl ve serdârları dahi kazâlarında bulunan sahîhü’l-esâmî ve esâmîsi çalık yeniçeri ve bulunan kul oğullarından bir ferdini geriye komayıp ale’l-umûm cümlesin bayrakları altına cem‘ ve evlerinden ve yerlerinden ihrâc fermânım olan iskelelere sevk ve tesyîr ve hâzır ve âmâde olan sefînelere tahmîl ve Kırım adasına irsâl ve bi-inâyetillâhi’l-müste‘ân bir gün evvel mahall-i memûrlarına îsâl ey[le]meye bezl-i kudret eyleyesin ancak bu vakti sâir evkāta kıyâs ile mikdâr-ı zerre tekâsülün zuhûr edecek olur ise özr ü cevâbın ısgā olunmayıp mesûl ve mu‘âkab olacağını mukarrer bilip ona göre basîret ve ittifâk üzere hareket eyleyip serdengeçdi ağalarından ve serdârlardan bayrakları küşâd etmekle özr ve illet eder bulunur ise ol makūleleri ahz u habs ve hakkında lâzım-ı zuhûr [olanların] cezâları [ve] sezâları edâ olunmak üzere cism ü resmiyle ale’t-ta‘cîl i‘lâm eyleyesiz ve siz ki bayrakları küşâd olunan serdengeçdi ağaları ve kazâlarından [kazâların] serdârlarısız <> vech-i meşrûh üzere amel ve hareket birle memûr olduğunuz Kırım cânibinde kul kethüdâsı bulunduğu mahalle varıp hıdemât-ı dîn ve Devlet-i aliyye’de her birleriniz mevcûd neferâtınız ile bezl-i kudret ve sarf-ı miknet? sonra ve gayret-i rızâullâh ve rızâ-i hümâyûnuma mazhar olmağla dikkat ve ser-i mû hilâfından dahi tehâşî ve mücânebet eyleyesiz deyü düstûr-ı mükerrem müşîr-i mufahham nizâmü’l-âlem hâlâ Dergâh-ı mu‘allâm yeniçerileri ağası olan vezîrim Abdullah Paşa -[e]dâmellâhu te‘âlâ iclâlehû- tarafından mühürlü mektûb verilmekle vech-i meşrûh üzere amel olunmak bâbında fermân-ı âlî-şânım sâdır olmuşdur buyurdum ki ( ) vusûl buldukda bu bâbda vech-i meşrûh üzere şeref-yâfte-i sudûr olan emrim ve vezîr-i müşârün-ileyhin tarafından verilen mühürlü mektûb mûcebince amel edip dahi hilâfından be-gāyet ihtirâz ve ictinâb eyleyesiz şöyle bilesiz alâme-i şerîfe i‘timâd kılasız. Tahrîren fî-evâili Ramazani’l-mübârek li-seneti hamsîn ve mi’ete ve elf. Be-makām-ı Kostıniyyeti’l-mahmiye