Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 254 Hüküm no: 284 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gebze menziline gönderilecek topçeken katırların günlük arpa ve saman ihtiyaçlarının tedarikine dair ferman kaydı Mefâhirü’l-kuzât ve’l-hükkâm ma‘âdinü’l-fezâil ve’l-kelâm Âsitâne-i sa‘âdetimden Gekbüze [Gebze]’ye varınca yol üzerinde vâki‘ olan kādılar -zîde fazluhum ve mefâhirü’l-emâsil ve’l-akrân kethüdâyerleri ve yeniçeri serdârları ve a‘yân-ı vilâyet iş erleri -zîde kadruhüm- tevkī‘-i refî‘-i hümâyûn vâsıl olucak ma‘lûm ola ki arabacıbaşı yedinde mevcûd mîrî topkeşân bargirlerinden şimdilik lüzûmu iktizâsı olduğuna binâen telef ve izâ‘at olunmamak için ba‘zı menzillerin bundan sonra verilecek in‘âmâta takas olunmak şartıyla tevzî‘i tertîb ve fermânım olan yüz doksan re’s <> topkeşân bargirinden otuz sekiz re’s Gekbüze menzili için tertîb ve menzil-i mezbûra nakl için mübâşir ta‘yîn olunan istihdâm kullarından ( ) —zîde kadruhû—ya teslîm ve menzil-i mezbûra tesyîr ve irsâl olunmak fermânım olup lâkin ol mikdâr bargirler menzil-i mezbûra varınca gereği gibi muhâfaza olunarak kazâdan kazâya irsâl ve yevmî iktizâ eden şa‘îr ve samanları ahâlî-i kazâ taraflarından <> tedârük olunması fermânım olmağın imdi sen [siz] ki mûmâ-ileyhimâsız işbu emr-i şerîf-i âlî-şânımla Gekbüze menzili için tertîb olunan mârrü’z-zikr <> otuz sekiz re’s bargirleri her kangınızın kazâsına varıp dâhil olur ise gereği gibi muhâfaza olunarak birbirinize irsâl ve yevmî iktizâ eden şa‘îr ve samanların ahâlî-i kazâ taraflarından tedârük ve mübâşire teslîm eyleyip bir türlü zarûret ve müzâyakalarına bâ‘is olmakdan ve yâhûd esnâ-i tarîkde bir re’si telef ve izâ‘at olunmakdan be-gāyet ihtirâz ve mücânebet etmeniz bâbında fermân-ı âlî-şânım sâdır olmuşdur buyurdum ki hükm-i şerîfimle vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i âlî-şânımın mazmûn-ı <> itâ‘at-makrûnuyla âmil olup hilâfıyla vaz‘ u hareketden be-gāyet ihtirâz ve ictinâb eyleyesiz şöyle bilesiz alâmet-i şerîfe i‘timâd kılasız. Tahrîren vasale ileynâ fî 3 Ramazan sene [1]150 Be-makām-ı Kostantıniyyeti’l-mahrûse