Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 57 Hüküm no: 15 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Osman’ın Hasan b. Hüseyin’e olan borcunu ödemesi Ma‘rûz; Üsküdar’da Hasanağa mahallesinde külhânda sâkin Ekrâd tâifesinden Hasan b. Hüseyin hasmı Süleyman b. Osman muvâcehesinde târih-i i‘lâmdan altı ay mukaddem Malatya kazâsında Ağvan karyesinde üç keyl tohum isti‘âb eder tarlasını yüz on guruş bedel mukābelesinde ma‘rifet-i sahib-i arz ile bana ferâgat etmek üzere kavl ve bedel-i ferâğdan elli guruşunu ber-vech-i peşîn mezbûr Süleyman’a teslîm eylediğimde ol dahi ahz ü kabz edip zikrolunan tarla hâlâ sahib-i arz ma‘rîfetiyle bana tefvîz olunmamağla medfû‘um olan meblağ-ı merkūm elli guruşu mezbûr Süleyman’dan taleb ederim deyü da‘vâ ettikde mezbûr Süleyman cevâbında fi’l-hakīka hâl müdde‘î-i mezbûr Hasan’ın bâlâda bast ü beyân ve tafsîl ve ayân eylediği vech üzere olup zikrolunan tarla hâlâ müdde‘î-i mezbûra tefvîz olunmayıp bedel-i merkūmdan elli guruşunu ahz ü kabz edip ol vechile zimmetinde reddi lâzım deyni olduğunu bi-tav‘ihî ikrâr ve i‘tirâf etmeğin mûcebince bedel-i merkūmdan makbûzu olan elli guruşu geri redd ü teslîme mezbûr Süleyman’a tenbîh olunduğu Üsküdar’da tescîl olunup vâki‘ hâl bi’l-iltimâs huzûr-ı âlîlerine i‘lâm olundu. Fî 17 Rebî‘ülâhir 1154