Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 56 Hüküm no: 14 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kefaletten dolayı Mihail’e olan borcunu ödemesi hakkında Manol’a tenbihte bulunulduğu Ma‘rûz; Fi’l-asl Kayseriye kazâsına tâbi‘ Sineson karyesinden olup İstanbul’da Kumkapı’da sâkin Mihail, hasmı Manol muvâcehesinde on iki sene mukaddem karye-i mezbûrede sâkin el-Hâc Yunus nâm kimesneden mezbûr Manol ile iştirâken istikrâz eylediğimiz kırk guruşdan her birimiz âhar[ın] zimmetine lâzım gelen meblağa emr ve kabûlü hâviye kefâlet-i sahîha-i şer‘iyye ile kefîl ve dâmin olup mezbûr Manol târih-i mezbûrda firâr etmekle meblağ-ı merkūmdan mezbûr Manol’un hissesine isâbet eden yirmi guruşu kefâletime binâ’en mezbûr el-Hâc Yunus’a ben edâ eylediğim ecilden hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını udûlden karye-i mezbûre sâkinlerinden olup Üsküdar’da misâfiren sâkin Aslan v. Praşkova ve Lefter v. Apostol nâm zimmîler şehâdetleriyle vech-i şer‘î üzere isbât etmeğin mûcebince meblağ-ı merkūm yirmi guruşu müdde‘î-i mezbûra edâya merkūm Manol’a tenbîh olunduğu bi’l-iltimâs huzûr-ı âlîlerine i‘lâm olundu. Fî 17 Rebî‘ülâhir sene 1154