Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 62 Hüküm no: 26 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenimahalle ahalisinin su ihtiyaçlarını karşılamak için açacakları kuyuların kimseye zararının olmadığı Ma‘rûz; Arzuhâlde mezkûr olan husûs ne vechiledir hakīkat-i hâl i‘lâm olunmak üzere dâ‘î-i devletlerine hitâben sâdır olan fermân-ı âlîlerine imtisâlen Başkâtib Ahmed Efendi dâ‘îleri irsâl olunup ol dahi Üsküdar’da Yenimahalle’ye varıp cemâ‘at-i Müslimîn huzûrlarında akd-i meclis-i şer‘ eyledikde fi’l-hakīka ahâlî-i mahallenin su içün muzâyakaları olduğu ümmet-i Muhammed’in ihbârlarıyla zâhir ve nümâyân oldukdan sonra mahalle-i mezbûre kurbünde Ermeni tâifesinin Fevz? Vakfı’ndan senede yüz otuz akçe mukāta‘alı ve ma‘mûlün-bih temessük ile mutasarrıf oldukları arsada hafr edecekleri beş aded âbâr ve yine mahâll-i merkūm kurbünde vâki‘ Kuds-i şerîf’de Mar Yakub Kenîsesi fukarâsı içün vakıf olan ma‘lûmü’l-hudûd bağın mütevellîsi Agob nâm râhibin izniyle derûn-ı bağda dahi üç aded âbâr hafr olundukda etrâfında kat‘â kimesneye zararı olmadığını ehl-i İslâmdan müseccelü’l-esâmî cemâ‘at-i Müslimîn icmâ‘ ve ittifâk etdiklerini mevlânâ-yı merkūm mahâllinde tahrîr ba‘dehû ma‘an mürsel Çukadâr el-Hâc Şaban ve el-Hâc Hanefi ile meclis-i şer‘a gelip alâ-vukū‘ihî inhâ ve ihbâr etdikleri bi’l-iltimâs huzûr-ı âlîlerine i‘lâm olundu. Bâkī fermân hazret-i veliyyü’l-emrindir. Fî 28 Rebî‘ülâhirsene 1154