Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 63 Hüküm no: 29 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çepni karyesinden İsmail çaldığı iddia edilen inekleri Mustafa Reis’ten aldığını beyan etmesi üzerine Mustafa’nın bulunması Ma‘rûz; Üsküdar hâricinde Çepni karyesinden İsmail, Tophâne’de Çukurcâmi mahallesi sâkinlerinden Dergâh-ı âlî yeniçerilerinin yetmiş beş cemâ‘ati neferâtından Kuzguncuk karyesi yasakçısı mübâşeret[iy]le meclis-i şer‘a ihzâr olan Ali muvâcehesinde târih-i i‘lâmdan bir gün mukaddem hamsîn gecesi karye-i mezbûre[de] tokat içinde mahfûz işbu meclis-i şer‘de mezbûr Ali yedinde olan biri siyah ve biri beyaz iki re’s ineklerim sirkat olunup mezbûrun yedinde bulmağla taleb ederim deyü da‘vâ etdikde mezbûr Ali cevâbında İstanbul’da Ayasofya kurbünde Mustafa Reis nâm kimesne yedinden iştirâ eyledim deyü mezbûrun mülkü olduğunu inkâr etmekle karye-i mezbûre sâkinlerinden Mehmed ve İsmail ve es-Seyyid Mustafa nâm kimesneler şehâdetleriyle sâbit ve müdde‘î-i mezbûr ba‘de’t-tahlîfi’ş-şer‘î zikrolunan inekler müdde‘î-i mezbûreye teslîm olundukdan sonra karye-i mezbûre ahâlîsinden müseccelü’l-esâmî kimesneler karye-i mezbûrede hayvanâtımızı gecelerde anbârlarımızın kilidi (...) zahîremizi hıfz edemeyip ol vechile emn ü râhatımız ref‘ edilmişdir deyü tekellüm etmeleriyle ahz [6a] olunan mezbûr Ali yasakçı kulları mübâşeretiyle huzûr-ı âlîlerine irsâl olunup mezbûr Mustafa İstanbul’da olduğunu mezbûr Ali <> ihbâr etmekle taraf-ı Devlet-i aliyyelerinden mübâşir kulları ma‘rifetiyle huzûr-ı âlîlerine ihzâr hakīkat-i hâl ma‘lûm-ı devletleri buyruldukda bâkī emr ü fermân hazret-i men-lehu’l-emrindir. Fî-selhi Rebî‘ülâhir sene 1154