Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 65 Hüküm no: 34 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cirid oynarken Hüseyin’in gözünü çıkaran Osman hakkında gereken işlemin yapılması Ma‘rûz; Sahib-i arzuhâl Hüseyin hasmı olup derûn-ı arzuhâlde mezkûrü’l-ism Osman muvâcehesinde târih-i i‘lâmdan yirmi beş gün mukaddem Hazret-i Eyüb’de bahçede mezbûr Osman cirid oynarken cirid ile sağ gözüme vurup cerh ve çıkarıp hatta târih-i mezbûr günü İstanbul’da Dürziler kârhânesinde ber-vech-i muharrer darb ve cerh eylediğini mezbûr Osman huzûr-ı Müslimînde ikrâr ve i‘tirâf etmekle mûceb-i şer‘îsini taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını lede’t-tezkiye adâletleri zâhir Kumkapı kurbünde Bali Paşa mahallesi sâkinlerinden Abdullah b. Hasan ve Emin Bey mahallesi sâkinlerinden el-Hâc Osman b. el-Hâc Mustafa nâm kimesneler şehâdetleriyle vech-i şer‘î üzere isbât etdikden sonra mezbûr Osman dahi ber-vech-i muharrer ikrâr ve i‘tirâf etmekle mûcib-i şer‘îsi ber’-i tâmme gelince tevkīf iktizâ eylediği mübâşiri Mehmed Çavuş kulları iltimâsıyla huzûr-ı âlîlerine i‘lâm olundu. Bâkī fermân meh lehu’l-emrindir. Fî 2 Cemâziyelevvel sene 1154