Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 67 Hüküm no: 38 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katırcı Pedros’un Tacir Marat’a olan borcunu ödemesi Ma‘rûz; Medîne-i Kayseriye kazâsına tâbi‘ Talas karyesinden olup İstanbul’da tüccâr tâifesinden Marat zimmî hasmı Üsküdar’da katırcı tâifesinden Pedros nâm zimmî ile mürâfa‘a-i şer‘ oldukda mezbûr Pedros târih-i i‘lâmdan bir sene mukaddem yedimden istikrâz eylediği otuz guruş zimmetinde bana deyni olduğunu târih-i i‘lâmdan iki gün mukaddem mahmiye-i İstanbul’da Ayazma kapısında terzi dükkânında ikrâr ve i‘tirâf etmekle taleb ederim deyü ba‘de’d-da‘vâ ve’l-inkâr müdde‘î-i merkūm müdde‘âsını lede’t-tezkiye adâletleri zâhir olan yine Ayazma kapısında sâkin terzi Yanaki v. Beyki ve Kostantin v. İstodi nâm zimmîler şehâdetleriyle vech-i şer‘î üzere isbât etmeğin mûcebince meblağ-ı merkūm otuz guruşu müdde‘î-i merkūm Marat zimmîye edâ ve teslîme mezbûr Pedros zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 3 Cemâziyelevvel sene 1154