Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 67 Hüküm no: 39 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın Erzurumlu İsa’ya fakirlik sebebiyle borcunu ödeyemediği Ma‘rûz-ı dâ‘î-i devletleridir ki; Arzuhâl sahiplerinden Erzurumlu İsa derûn-ı arzuhâlde mezkûrü’l-ism Mustafa Paşazâde Ali Paşa tarafından vekîl-i sâbitü’l-vekâlesi el-Hâc Ahmed Ağa ile mürâfa‘a-i şer‘-i şerîf oldukda beş sene mukaddem cihet-i deyn-i şer‘îden sekiz yüz altmış guruş ile seksen guruş kıymetli bir karsak kürk müvekkil-i mezbûra îdâ‘ ve teslîm edip aynı mevcûd ise aynını değil ise kıymeti ile meblağ-ı merkūmu taleb ederim deyü da‘vâ etdikde vekîl-i mezbûr cevâbında cihet-i merkūmeden sekiz yüz altmış guruş müvekkil-i mezbûrun deyni olduğunu ve kırk guruş kıymetli kürkü kabz ve istihlâk eylediğini ikrâr ve i‘tirâf edip ol vechile müvekkil-i merkūmun müdde‘î-i mezbûra ber-vech-i muharrer cihet-i deynden sekiz yüz altmış guruş ve kürk kıymetinden dahi kırk guruş ki cem‘an dokuz yüz guruş deyni olduğunu mukırr ve mu‘terîf olup lâkin deyn-i mezkûru edâya kudreti olmayıp asâr iddi‘â edip yesârı sâbit olmadan şer‘an [7b] habsi lâzım gelmeyip müdde‘î-i mezbûr müvekkil-i merkūmun yesârını beyân içün şâhide havâle olduğu mübâşiri Osman Çavuş kulları iltimâsıyla huzûr-ı âlîlerine i‘lâm olundu. Bâkī fermân men-lehu’l-emrindir. Fî 5 Cemâziyelevvel sene [1]154