Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 75 Hüküm no: 57 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pavlov v. Safer v. Yuvan’ın tasarrufunda bulunan Kuzguncuk’taki susam yağhanesini devrettiği Ma‘rûz; Bil-iltimâs taraf-ı şer‘den irsâl olunan Ahmed Efendi dâ‘îleri Üsküdar’a tâbi‘ Kuzguncuk karyesinde vâki‘ şirûganhâneye varıp ba‘de akdi’l-meclis merhûm Yusuf Ağa kethudâyı sâbık Civan Kapıcızâde Vakfı’ndan ma‘lûmü’l-hudûdi’l-müştemilât bir bâb şirûganhâneye mutasarrıf olan Pavlov v. Safer v. Yuvan nâm zimmî tarafından vekîl olduğu Arslan v. Dimitri ve Yani v. Yuvan nâm zimmîler şehâdetleriyle şer‘an sâbit olan Doğramacı Artin zimmî meclis-i mezkûrda sahibe-i arzuhâl Fotine Nasrâniye muvâcehesinde zikrolunan şirûganhâneyi beş yüz elli guruş bedel mukābelesinde ma‘rifet-i mütevellî ile mezbûre Fotine Nasrâniye’ye ferâğ ve tefvîz etdikde ol dahi ber-vech-i muharrer tefevvüz ve kabûl ve bedel-i merkūmu üç gün tamamına değin vekîl-i mezbûra edâya ta‘ahhüd edip zikrolunan şirûganhâneye ve masrûfâtına müte‘allika âmme-i de‘âvî ve mutâlebâttan sahibe-i arzuhâl Fotine Nasrâniyenin zimmetini ibrâ ve ıskāt edip bu vechile kat‘-ı nizâ‘ etdikleri rızâlarıyla merkūm dâ‘îleri mahâllinde tahrîr ba‘dehû ma‘an mürsel Çukadâr Ömer ve Muhzır Hanefî ile meclis-i şer‘a gelip alâ-vukū‘ihî inhâ ve ihbâr eylediği mübâşiri İsmail Çavuş iltimâsıyla huzûr-ı âlîlerine i‘lâm olundu. Fî 7 Cumâdelûlâ sene 1154