Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 78 Hüküm no: 64 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Karabet’in Koruk’a olan borcunu ödemesi Ma‘rûz; Sahib-i arzuhâl Koruk zimmî hasmı Terzi Karabet zimmîyi ta‘yîn buyrulan Kapıkethudâsı İsmail Beşe kulları mübâşeretiyle meclis-i şer‘a ihzâr ve muvâcehesinde mukaddemâ mezbûr Terzi Karabet ile beynimizde ahz ü i‘tâ vâki‘ olup bin yüz elli üç senesi Şa‘bâ[n]ü’l-mükerremi târihiyle müverrah i‘tâ olunan hüccetinden yedi ay sonra merkūm Karabet zimmîye elli guruşluk zer-i mahbûb ve elli guruşluk Mısır zincirli altun ki cem‘an yüz guruş ikrâz ve teslîm eylediğimde ol dahi ber-vech-i muharrer ahz ü kabz edip meblağ-ı mezkûr yüz guruşu vech-i meşrûh üzere zimmetinde bana deyni olduğunu şuhûd mahzarında ikrâr ve i‘tirâf ve inhâ etmekle hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını lede’t-tezkiye adâletleri zâhir Üsküdar’da Yenicâmi‘-i şerîf kurbünde sâkin Yazıcı el-Hâc Hüseyin Efendi b. Mahmud ve Ketânî Molla Osman b. Mehmed ve Manav Ömer Beşe b. Mehmed nâm kimesneler şehâdetleriyle vech-i şer‘î üzere isbât etmeğin mûcebince meblağ-ı merkūm yüz guruşu müdde‘î-i mezbûra edâ ve teslîme mezbûr Terzi Karabet zimmîye tenbîh olunduğu mübâşiri iltimâsıyla huzûr-ı âlîlerine i‘lâm olundu. Fî 18 Cumâdelûlâ sene 1154