Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 82 Hüküm no: 73 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorlu kızı ismiyle meşhur olan Âmine’nin kötü yolda olup ahaliyi rahatsız ettiği Ma‘rûz; Sahibe-i arzuhâl Âişe derûn-ı arzuhâlde mezkûrü’l-ism Çorlu kızı demekle ma‘rûfe Âmine nâm avrat muvâcehesinde mezbûre Âmine kendi hâlinde olmayıp beni idlâl kasdıyla gelip mel‘anetine müsâ‘ade eylemediğimden zümre-i eşkıyâyı kapıma gönderip şer‘ ve mazarrâtından hâb ü rahatım bi’l-külliye ref‘ olmuşdur deyü da‘vâ ve meclis-i şer‘de hâzırûn mezbûre Âmine’nin sâkine olduğu Aşcıbaşı mahallesi İmâmı Mehmed Efendi ve Haydarpaşa Ustası Mehmed Usta ve sâir ahâlî-i mahalleden Molla Salih ve Hüseyin ve Abdullah ve Mehmed ve Mustafa ve İbrahim nâm kimesnelerden her biri mezbûre Âmine kendi hâlinde olmayıp ümmet-i Muhammed’in iyâl ve evlâdını idlâl ve odaya avrat çıkarıp pezevenk olmakla bir vechile nâ-mahremden ictinâbı olmamağla bi’d-defa‘ât tenbîh olundukda mütenebbihe olmayıp mezbûrenin fısk ü fesâddan sû-i hâli haddi tecâvüz etmişdir deyü muvâcehesinde alâ-tarîkı’ş-şehâde haber vermeleriyle mezbûre Âmine’nin ta‘zîr ve tedîbi re’y-i âlîlerine havâle olunup ve mezbûre Âmine mübâşiri Osman Çavuş kulları ile huzûr-ı âlîlerine irsâl olundu. Fî 24 Cumâdelûlâ sene 1154