Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 82 Hüküm no: 74 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz’in çalınan ve bir kısmı iade olunan kıymetli eşyalarından kalan kısmının kıymetinin belirlenmesi Ma‘rûz; Sahib-i arzuhâl Serkiz zimmî ta‘yîn buyrulan Mustafa Çavuş kulları mübâşeretiyle dîvân-ı âlîlerinde ma‘kūd meclis-i şer‘a ihzâr olunan Kivorg nâm zimmî muvâcehesinde târih-i i‘lâmdan dört ay mukaddem Üsküdar’da Yenimahalle’de menzilim açılıp derûn-ı menzilden bir mücevher köstek ve bir incili serpûş [ve] bir incili zülüflük ve bir inci tepelik ve bir mücevher haç ve bir top Şam alacası ve on munakkaş Frenk-pesende yağlığım sirkat olundukdan sonra üç gün mürûrunda bâlâda mezkûr olan eşyâmdan bir mücevher köstek ve bir incili serpûş ve bir incili zülüflüğü mezbûr Kivorg yedinde bulduğumda bana def‘ ve teslîm edip ben dahi ahz ü kabz eylediğimden sonra bâkī kalan bir tepelik ve bir haç ve bir top Şam alacası ve on yağlık içün beni teşhîr eyleme sana veririm deyü şuhûd mahzarında ikrâr ve işhâd eylemişdir deyü ba‘de’d-da‘vâ mezbûr Kivorg cevâbında teslîm eylediği eşyâ-i mezkûreyi gāibetü ani’l-meclis müste’ciresi olan bir avratdan yetmiş yedi buçuk guruşa iştirâ eyledim müdde‘î-i mezbûrun mülkü olduğu ma‘lûmum olmadığına binâ’en teslîm eyledim bakī kalan eşyâ içün ber-vech-i muharrer ikrâr ve i‘tirâfını inkâr edicek müdde‘î-i mezbûr merkūm Kivorg zimmînin ber-vech-i meşrûh ikrârını lede’t-tezkiye adâletleri zâhir Üsküdar’da Bitpazarı’nda Oturakçı Molla Mehmed b. Hâfız Mehmed nâm kimesne ile Yenimahalle’de Avadik v. Sahak nâm zimmî şehâdetleriyle isbât edip lâkin kıymetleri henüz sâbit olmamağla kıymetini beyân içün sahib-i arzuhâl şâhide havâle olunduğu mübâşiri kulları iltimâsıyla huzûr-ı âlîlerine i‘lâm olundu. Fî 27 Cumâdelûlâ sene [1]154