Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 96 Hüküm no: 105 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe’nin boşadığı karısı Havva bt. Osman’a mihrini ödemesi Ma‘rûz; Üsküdar’da Mehmed Paşa mahallesinde sâkine ve zâtı vech-i şer‘î üzere mu‘arrefe olan Havva bt. Osman nâm hatun meclis-i şer‘de zevc-i mutallakı Hasan Beşe b. Kasım nâm kimesne ile mürâfa‘a-i şer‘-i şerîf olduklarında mezbûr Hasan Beşe mukaddem zevcim olup târih-i i‘lâmdan üç sene mukaddem beni bâyinen tatlîk ve diyâr-ı âhara gitmekle zimmetinde mütekarrer ve ma‘kūdün-aleyh olan iki bin akçe mehr-i mü’eccelim mezbûrda kalmağla taleb ederim deyü ba‘de’d-da‘vâ gıbbe’s-suâl mezbûr Hasan Beşe cevâbında işbu müdde‘iye Havva bin akçe mehr-i mü’eccel tesmiyesiyle zevcesi olup târih-i mezbûrda tatlîk edip hâlâ bin akçe mezbûreye deyni olduğunu ikrâr, ziyâde bin akçeyi inkâr ettikde müdde‘iye-i mezbûre ber-vech-i muharrer müdde‘âsını udûlden yine mahalle-i mezbûre sâkinlerinden Mehmed b. İbrahim ve diğer Mehmed b. Süleyman nâm kimesneler ile nisâ tâifesinden Âişe bt. Ali ve Fâtıma bt. Mustafa nâm hatunlar şehâdetleriyle muvâcehesinde isbât etmeğin mûcebince meblağ-ı merkūm iki bin akçe mehr-i mü’eccelini müdde‘iye-i mezbûre Havva’ya edâ ve teslîme mezbûr Hasan Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 29 Cumâdelâhire sene 1154