Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 102 Hüküm no: 119 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hırsızlık ve kapkaçcılık yaptığı belirlenen Kıbti Ali b. İbrahim’in yakalandığı Ma‘rûz; Çatalca ahâlîsinden İstanbul’da misâfiren sâkin Mustafa Üsküdar’da Yenimahalle’de sâkin Kıbtî tâifesinden sârık Ali b. İbrahim asesbaşı tarafından Haseki İbrahim kulları mübâşeretiyle meclis-i şer‘a ihzâr ve muvâcehesinde on sekiz gün mukaddem İstanbul’da çardak önünde Birinci Hüseyin Beşe dükkânında otururken koltuğumdan boğça içinde seksen guruş kıymetli bir telli Bağdad abayı ve on iki guruş kıymetli bir Bağdad siyah puşi ve on guruş kıymetli bir bürüncük gömlek ve don ve bir uçkur ve makramayı koltuğumdan ahz ü kabz ve firâr eyledi deyü da‘vâ ettikde mezbûr Kıbtî Ali cevâbında mahâll-i merkūmda boğçayı buldum ba‘dehû puşiyi kasap Hüseyin’e ve abayı Yenimahalle’de ipekçi Dimitri zimmiye ve gömleği Yenimahalle subaşısı hazır bi’l-meclis Bostancı Mehmed’e verdim deyü takrîr ve zikrolunan abayı zimmî-i mesfûrdan ve puşiyi kasab-ı merkūmdan haseki-i merkūm çıkarıp meclis-i şer‘a getirdikde mu‘âyene olundukda abayı söküp ...? ve şemse ve yeni telef mâ‘adâ parçalarını mevcûd ve puşinin aynı dahi mevcûd ve gömleği subaşı-yı merkūm iki guruş deyni içün rehin vaz‘ eyledi deyü cevâb ve zimmî-i mesfûr Dimitri’ye Yenimahalle Kethudâsı Minas kefîl olduğunu ihbâr ve meclis-i şer‘a ihzârları içün muhzır ve çukadâr ta‘yîn olundukda mezbûrûn Kasab Hüseyin ve İpekçi Dimitri ve kefîli Minas zimmîler bulunmayıp sârık-ı merkūm Kıbtî Ali ve Yenimahalle subaşısı ve Bostancı Mehmed huzûr-ı âlîlerine i‘lâmlarıyla irsâl olundu. Husûs-ı merkūm ma‘lûm-ı devletleri buyruldukda emr ü fermân devletlü, inâyetlü efendim sultânım hazretlerinindir. Fî 18 Recebi’l-ferd sene 1154