Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 103 Hüküm no: 122 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katırcı Marat’ın Sekyaz’a bargir bahasından olan borcunu ödemesi Ma‘rûz; Üsküdar’da Selâmi mahallesinde sâkin habbâz tâifesinden Sekyaz zimmî hasmı katırcı tâifesinden Marat zimmî ile mürâfa‘a-i şer‘ oldukda mezbûr Marat bundan akdem yedimden iştirâ ve kabz eylediği ecnâs ve re’si ve esmân-ı kıymetleri beynimizde ma‘lûm bargirler bahâsından ba‘de külli’l-hesâb kırk üç guruş bir rub‘ hakkım olup hatta târih-i i‘lâmdan üç gün mukaddem medîne-i mezbûrede Yalta Hanı’nda mezbûr Marat ile hesap gördüğümüzde cihet-i merkūmeden meblağ-ı merkūm zimmetinde bana deyni olduğunu ikrâr ve i‘tirâf etmekle taleb ederim deyü ba‘de’d-da‘vâ ve’l-inkâr müdde‘î-i mesfûr Sekyaz zimmî müdde‘âsını udûlden Bağlar mahallesi sâkinlerinden Yusuf Beşe b. Abdullah ile udûl-i millet-i Nasârâdan mekârî tâifesinden Han-ı mezbûrda misâfiren sâkin Nikogos v. Mardiros nâm zimmî şehâdetleriyle vech-i şer‘î üzere isbât etmeğin mûcebince meblağ-ı merkūm kırk üç guruş bir rub‘ı müdde‘î-i mesfûr Sekyaz zimmîye edâya mezbûr Marat’a tenbîh olunduğu bi’l-iltimâs huzûr-ı âlîlerine i‘lâm olundu. Fî 19 Receb sene 1154