Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 349 Hüküm no: 349 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin ölen babasından intikal eden evdeki hissesini kardeşi el-Hacı Mustafa’ya sattığı El-emru hasbe-mâ hurrire fîhi harrerehü’l-fakīr ileyhi te‘âlâ Yahya Mukīmzâde el-müvellâ hilâfeten bi-medîneti Kostantıniyye el-mahmiyye Gufira-leh. Mahmiye-i İstanbul’da Âşıkpaşa Mahallesi sükkânından iken bundan akdem vefât eden Haffâf el-Hâcı Mehmed b. Sâdık b. Abdullah’ın verâseti zevce-i metrûkesi Hadice bt. Mustafa nâm hatun ile sulbî kebîr oğulları el-Hâcı Mustafa ve Ahmed Çelebi ve İsmail Çelebi ve Osman Çelebi ve sulbiye kebîre kızı Ümmügülsüm ile sulbî oğlu Selim nâm sagīre münhasıra ve tashîh-i mes’elesi seksen sekiz sehmden olup sihâm-ı mezkûreden on biri zevcesi mezbûre Hadice Hatun’a ve on dörderi oğulları mezbûrûndan her birine ve yedisi kızı mezbûre Ümmügülsüm’e isâbeti tahakkukundan sonra mezbûr Ahmed Çelebi meclis-i şer‘-i şerîf-i enverde karındaşı bâ‘isü hâze’l-kitâb mezbûr el-Hâcı Mustafa mahzarında ikrâr ve takrîr-i kelâm edip mûrisimiz müteveffâ-i mezbûrun terekesinden olup mahalle-i mezbûrede vâki‘ Na‘lband el-Hâcı Ali mülkü ve bir tarafdan Nefîse Hanım Vakfı’ndan mahalle-i mezbûre imâmlarına meşrûta olup yine müteveffâ-i mezbûrun hayâtında tasarrufunda olan bahçe bir tarafdan Bevvâb Mustafa Bey mülkü ve bir tarafdan tarîk-i âm ile mahdûd büyût-ı adîdeyi muhtevî mülk menzilden tashîh-i mezkûr üzere <> bana isâbet eden on dört sehm hisse-i irsiyyemi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz yetmiş guruşa karındaşım mezbûr el-Hâcı Mustafa’ya bey‘ ve temlîk ve zikrolunan bahçeden altı sehmden bir sehm şâyi‘ini bâ-ma‘rifet-i mütevellî altmış altı guruş bedel mukābelesinde yine karındaşım mezbûra ferağ ve tefvîz eylediğimde ol dahi ber-vech-i muharrer iştirâ ve temellük ve tefevvüz ve kabûl eyledikden sonra semen-i mezkûr ile bedel-i merkūm cem‘an iki yüz otuz altı guruşu yedinden tamamen ahz u kabz eyledim. Min-ba‘d zikrolunan menzil ve bahçede kat‘â alâka ve medhalim kalmayıp menzil-i mezkûrda olan on dört sehm karındaşım mezbûr el-Hâcı Mustafa’nın mülk-i müşterâsı ve mârru’z-zikr bahçed[e] olan altı sehm şâyi‘den biri dâhil-i havz-ı tasarrufu olmuşdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Recebi’l-ferd li-sene selâse ve erba‘în ve mi’e ve elf. Şuhûdü’l-hâl: Hammâmî el-Hâcı İbrahim Ağa, Müezzinzâde Mehmed Efendi, İbrahim Beşe b. Abdullah, Süleyman Çelebi b. İbrahim, Halil Ağa b. el-Hâcı İbrahim, Berber Ahmed Çelebi b. Hüseyin, es-Seyyid Ali Çelebi b. Mehmed, Veli Çelebi b. Hasan, Hüseyin b. Oruc, Haffâf el-Hâcı Ahmed b. Abdullah, Haffâf Hasan Çelebi b. Abdullah, Mehmed Çelebi b. el-Hâcı Mustafa, İsmail b. Süleyman.